Kobul va Toshkent o‘rtasidagi aviaqatnov yo‘lga qo‘yiladi, mavjud barcha muammolar hal etilgan. Bu haqda Sputnik O‘zbekiston xabar bermoqda.

Xabarda qayd etilishicha, ushbu ma’lumotni afg‘on aviakompaniyasi Kam Air'ning O‘zbekistondagi vakolatxonasi vakili ma’lum qilgan.

"Yaxshi yangiligimiz bor – biz 14 dekabrdan reyslarni yana davom ettiramiz" – deyiladi xabarda aviakompaniya vakili tilidan.

Vakilning qayd etishicha, birinchi bosqichda yo‘lovchi aviaqatnovlari haftada ikki bor – seshanba va shanba kunlari amalga oshiriladi.

Ammo ushbu aviaqatnov haqida Toshkent tomoni hech qanday izoh bermagan. "O‘zbekiston havo yo‘llari" o‘z saytida ham, ijtimoiy tarmoqdagi boshqa sahifalarida ham Kobul bilan qatnovlar tiklanayotgani haqida bir og‘iz xabar bermaydi. Aviakompaniyada ishlovchi manbaning aytishiga ko‘ra, 14 dekabrda Kobuldan keladigan, yoki Kobulga ketadigan hech qanday aviareys yo‘q.

Ma’lumot uchun, ikki haftalar oldin ham xuddi shunday xabar tarqagan, unda Kobul bilan aviaqatnovlar 1 dekabrdan yo‘lga qo‘yilishi aytilgandi. Biroq o‘shanda ham ma’lumot "O‘zbekiston havo yo‘llari" tomonida tasdiqlanmagan. 

• Afg‘oniston
• Aviaqatnov
• O‘zbekiston
• Toshkent
• Uzbekistan airways