Bir muddat oldin Toshkent shahridagi “Qo‘yliq” dehqon hamda ulgurji bozorlarining Toshkent viloyatida joylashgan yangi savdo majmuasi – “Food city”ga ko‘chirilishiga oid xabar tarqalgan edi.

O‘zAning “Qo‘yliq dehqon bozori”ning xavfsizlik bo‘yicha direktor o‘rinbosari Qodirjon Normirzayevga tayanib ma’lum qilishicha, viloyat hududidagi bozorga ko‘chish haqida bozor ma’muriyatiga hech qanday xabar kelib tushmagan.

– Yangi ishlangan ko‘prik loyihasi o‘z nomi bilan hali loyiha. Ushbu ko‘prik qurilishi ma’lum bir yilgacha, deb tasdiqlanmagan. Qurilgan taqdirda ham ko‘prik bilan bozor oralig‘ida ancha joy bor. Uni kapalak shaklida, ya’ni dumaloq holatda qurib, yo‘l tushirilganda ham bozorga xalaqit qilmaydi. Toshkent viloyatidagi yangi bozorga ko‘chish haqida hali bizlarga shahar hokimligi yoki bozor markazi tomonidan hech qanday xabar berilmagan, – deydi bozor xodimi Normirzayev.

O‘zA tayyorlagan videolavhada bozor sotuvchilari va ishchilari 31-dekabrga qadar yangi bozorga ko‘chish bo‘yicha ogohlantirish xati ma’muriyat tomonidan berilganini ta’kidlamoqda.

Suhbat jarayonida sotuvchilar bozor ma’muriyati tomonidan 1-yanvardan o‘z joyini bo‘shatib qo‘yishi to‘g‘risidagi ogohlantirish xatiga imzo qo‘ydirib olinayotgani haqida ma’lum qilgan.

Normirzayev mazkur holatga munosabat bildirib, bu “pattachi”lar tomonidan amalga oshirilgani va izoh bera olmasligini aytgan.

• Bozor
• Toshkent