Ayni paytda Sirdaryo viloyati hokimi Gʻofurjon Mirzayevning viloyatni ijtimoiy-iqtisodiy rivojlantirish boʻyicha 2021-yil yakunlari hamda 2022-yildagi dolzarb vazifalar toʻgʻrisida xalqqa murojaati boʻlib oʻtmoqda.

Unda Respublika va mahalliy OAV vakillari ham ishtirok etyapti. Bu haqda bevosita Sirdaryoda boʻlib turgan Xabardor.uz muxbiri xabar bermoqda. Murojaat doirasida viloyat hokimi kambagʻallikni qisqartirish va aholi daromadini koʻpaytirishga ham toʻxtatilib oʻtdi.

Qayd etilishicha, joriy yilda viloyatda jami 608 ta oila hamda uning  2,4 ming nafardan ziyod aʼzolari kambagʻal deb hisoblanib, “Temir daftar”ga kiritilgan.

Bugungi kunda “Temir daftar”ga kiritilgan 1,5ming nafar mehnatga layoqatli aholining 1,4 ming nafari (94,8%) bandligi taʼminlangan.
Shuningdek, “Temir daftarda”gi ehtiyojmand oilalarga “Saxovat va koʻmak” jamgʻarmasi mablagʻlari hisobidan  1,8 mlrd.soʻmlik yordam koʻrsatilgan.

“Yoshlar daftari”dan chiqarilgan 19 ming 353 nafar (93,6 foiz) yoshlarning 7 ming nafari doimiy ish oʻrni bilan taʼminlangan, 7 729 nafariga 50 sotixdan jami 3 870 gektar yer maydonlari ajratilib, 2 102nafariga 6 mlrd. soʻmga yaqin imtiyozli kreditlar berilgan.

Yoshlar jamgʻarmasi mablagʻlari hisobidan 1 551 nafar yoshlarga oʻzini oʻzi band qilish uchun asbob uskunalar ajratilgan. 1 400 nafar yoshlarga turli koʻrinishdagi yordamlar koʻrsatilgan.

Shuningdek, “Ayollar daftari”ga kiritilgan12 381 nafarining bandligi taʼminlangan. Boquvchisini yoʻqotgan 2 985 nafar ehtiyojmand xotin-qizlarga 2,7 mlrd. soʻmlik moddiy yordamlar koʻrsatilgan.

2 417 nafar xotin-qizlarga 1,5 mlrd. soʻmlik moddiy yordam koʻrsatilgan boʻlsa, 12 168 nafariga tibbiy, huquqiy maslahatlar va psixologik yordamlar koʻrsatilgan.

Keltirilishicha, Prezident topshirigʻiga asosan tashkil etilgan jamgʻarma hisobidan jami 36,8 mlrd. soʻm, shundan “Temir daftar” uchun 13,1 mlrd. soʻm, “Yoshlar daftari” uchun 12,1mlrd. soʻm va “Ayollar daftari” uchun 11,6 mlrd. soʻm orttirilgan mahalliy byudjet mablagʻlaridan ajratib berilgan.

• Sirdaryo
• hokim