Shveysariya sudi Gulnora Karimovaga aloqador ish bo‘yicha hukm chiqardi.
Federal Jinoyat sudi Gulnora Karimovaga aloqador shirkatga tegishli 293 million AQSh dollardan ortiq mablag‘ni musodara qilishga qaror qildi. Bu haqida Swissinfo nashri xabar berdi.
Qayd etilishicha, Karimovaga tegishli bo‘lgan Takilant nomli shirkat jinoiy tergov ostidagi 5 ta Shveysariya bank hisoblaridan ikkitasiga aloqador edi. Kompaniyadan musodara qilingan umumiy summa 350 million AQSh dollardan ortiqni tashkil qilgan.
Sud bu summaning katta qismi musodara qilinishi kerak degan xulosaga keldi, chunki ayblanuvchilarning bir qismi, jumladan, Karimova va uning yordamchisi jinoiy pul yuvishda aybdor deb topilgan. Biroq Takilant’ga taxminan 70 million AQSh dollar qaytariladi.
"Buning sababi, bir nechta kompaniyalar bilan bog‘liq bo‘lgan ushbu aktivlarning barchasi jinoyat natijasida qo‘lga kiritilgani aniqlanmagan”,— deyiladi Federal Jinoyat sudi e’lon qilgan bayonotda.
Yozilishicha, mablag‘ musodara qilinganiga qaramay, Karimovaning advokatlari sud qarorini o‘ziga xos g‘alaba sifatida baholamoqda.
“Jinoyat ishlari bo‘yicha Federal sudning bu qarori, birinchi navbatda, OAG mijozimizning O‘zbekistonda bir necha yil o‘zboshimchalik bilan xibsga olinishidan foydalanib, uning barcha mol-mulkini musodara qila olmagani bilan bog‘liq”, — deydi Karimovaning advokati Greguar Mangeat.
Ma’lumot uchun, sud hukmi bilan Gulnora Karimovaga 13 yil 4 oy muddatga ozodlikdan mahrum qilish jazosi tayinlangan. Mahkuma jazo muddatini O‘zbekistonda o‘tamoqda.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!