30 yil ichida 300 marta qimmatlashgan 3 aksiya - Microsoft, Monster Beverage, Balchem

  • 10:20 / 15.02.2017
  • 10493

Yangi Apple yoki Johnson & Johnson kompaniyalari endigina ishga tushganda ularning aksiyalarini xarid qilish va kompaniyaning o‘sishi hamda o‘z sohasining yetakchisiga aylanayotganini ko‘rish - har qanday investorning orzusi. Afsuski, bunday holatni har doim ham kuzatishning iloji yo‘q.

Bundan tashqari, investorlar shunday javohir topgan taqdirda ham kompaniyaning bu darajada rivojlanishini kutishning uddasidan chiqishmaydi. Bugungi kunda har qanday ma'lumotni bir urinishdayoq topish mumkin. Internet va algoritm savdosi asrida investitsiyalash asta-sekinlik bilan o‘z mohiyatini yo‘qotib boradi. InsiderPro shu haqidagi maqolasi bilan bo‘lishdi.

Atigi 30 yil ichida bu kompaniyalar bir necha dollarni millionlarga aylantirishdi. Agar 1986 yilning may oyida bu aksiyalardan biriga 10 ming dollar sarmoya qilganingizda edi, hozir sizning kamida 3,68 million dollaringiz bo‘lardi. Aytmoqchi, ularning birini siz ham bilasiz.

 

Balchem

10 ming dollar 3,68 million dollarga aylandi. Daromad 36 784 foizni tashkil qildi.

Aksariyat investorlar Balchem haqida eshitmagan bo‘lishsa kerak. Hattoki fantastik o‘sishdan keyin ham kompaniya kapitalizatsiyasi o‘rtachaligicha qolmoqda. Balchem jonivorlar uchun ozuqa va ozuqaviy qo‘shimchalar, oziq-ovqat aromatizatorlari, sanoat va farmatsevtika uchun maxsus ingridiyentlar ishlab chiqaradi.

Balchem faoliyatidagi muvaffaqiyat nafaqat biznes xilma-xilligi, balki innovatsiyalar (va biroz omad) natijasidir. Wall Street Journal'da yozilishicha, 1990-yillar oxirida kompaniya jiddiy muammolarga duch kelgan: ozuqaviy qo‘shimchalar ishlab chiqarishning yangi texnologiyasi foyda bermadi. Yaxshiki, boshqaruv va xodimlar xarajatlarning avvalgi holatini saqlab qolib, ishlab chiqarishni ikki karra ko‘paytirishga hamda mavjud mahsulotlarni sotishning yangi kanallarini topishga muvaffaq bo‘lishdi.

Bugungi kunda Balchem baholari adolatlidek tuyuladi. Bunday misli ko‘rilmagan o‘sishdan keyin bu tabiiy. Aksiyalar qiymati - yil yakunlariga ko‘ra, taxmin qilinayotgan daromaddan 31 karra yuqori. Shu bois kompaniya investorlar ishonchini oqlash uchun sotuvlar darajasini saqlab qolishi lozim.

 

Monster Beverage

10 ming dollar 5,09 million dollarga aylandi. Daromad 50 843 foizni tashkil qildi.

Monster Beverage muvaffaqiyati ortida ham innovatsiyalar turadi. 1986 yilning may oyidan uning aksiyalari narxi deyarli 510 barobarga "parvoz qildi". Bunga kompaniya tomonidan ishlab chiqariluvchi energetik ichimliklarning mashhurligi sabab bo‘ldi.

So‘nggi 12 oy ichida Monster deyarli 3 milliard dollar ishlab topdi. Daromadning asosiy qismi energetik ichimliklar sotuvidan tushgan. Taqqoslash uchun, 2006 yilda kompaniya daromadi atigi 606 million dollarni tashkil qilgan.

Bu Monster o‘z yo‘lida to‘siqlarga duch kelmadi degani emas. 2012 yilda AQSh Sanitariya nazorati boshqaruvi go‘yoki Monster ichimliklari iste'moli natijasida yuzaga kelgan 5 o‘lim holati bo‘yicha tergov ishlarini o‘tkazdi. Ma'lum bir muddatga kompaniya ichimliklariga bo‘lgan talab qisqardi. Biroq sotuvlar statistikasiga ko‘ra, muammolar tezda unutilgan.

Oxirgi yillarda kompaniyaning Coca-Cola bilan hamkorligi katta daromad keltirdi. Kompaniyalar bitimiga ko‘ra, Coca-Cola kompaniyasining barcha energetik ichimliklari Monster'ga o‘tgan. Monster esa, o‘z navbatida, noenergetik ichimliklarni ishlab chiqarishdan voz kechib, ularning retseptini Coca-Cola'ga topshirgan. Bundan tashqari, Coca-Cola Monster Beverage'ning 16,7 foiz aksiyasini qo‘lga kiritgan. Natijada 2014 yilda Monster kompaniyasining yalpi yillik rentabelligi 54,4 foizdan 62,8 foizga ko‘tarilgan, sof daromad esa so‘nggi uch yilda ikki barobarga oshgan.

 

Microsoft

10 ming dollar 6,47 million dollarga aylangan. Daromad 64 633 foizni tashkil qilgan.

Ro‘yxatimizdagi so‘nggi kompaniya - Microsoft texnologiya giganti. So‘nggi 30 yil davomida uning aksiyalari 646 barobarga qimmatlashdi.

Microsoft muvaffaqiyati sabablarini tushunish oson. Operatsion tizim bozoridagi katta raqobatga qaramay, Microsoft o‘z pozitsiyasini deyarli yo‘qotmadi. Bugungi kunda Windows operatsion tizimi (OT) personal kompyuter (PK) bozorida shu qadar hukmronki, bu hatto kishiga qo‘rquv soladi.

NetMarketShare.​com ma'lumotlariga ko‘ra, 2017 yilning yanvarida Windows 7 va Windows 10 - PKlardagi barcha operatsion tizimlarning 72,5 foizini tashkil qilgan. Bunga u qadar mashhur bo‘lmagan XP, 8.1, 8, Vista va NT'ni qo‘shsak, Microsoft'ning ulushi 91,5 foizga oshadi. Bozordagi monopoliya kompaniyaga o‘z narxlarini belgilashga imkon beradi, albatta.

Biroq hatto Microsoft'ning ham kamchiliklari mavjud. Masalan, Nokia mobil bo‘limi va aQuantive servisi xaridi yaqqol xatolik bo‘ldi. Skype'ga sarflangan 8,5 milliard dollar ko‘p sonli yangi foydalanuvchilar bilan ta'minladi, lekin sezilarli moliyaviy natija bermadi.

Microsoft PK uchun operatsiya tizimlari bozorida yetakchi o‘yinchiligicha qolmoqda. Yuqori operatsion rentabelligi tufayli erkin pullar oqimi har yili kompaniyaga 23-26 milliard dollar olib keladi. Bundan tashqari, yaqindagina LinkedIn'ning qo‘lga kiritilishi rivojlanish va daromad topishning yangi imkoniyatlarini ochadi.

Teglar