Toshkentda “O‘zbekiston nefti va gazi” xalqaro forumi doirasida O‘zbekiston bosh vaziri Abdulla Aripov va Perm o‘lkasi (Rossiya) gubernatori Dmitriy Maxonin o‘rtasida uchrashuv bo‘lib o‘tdi.

Ikki tomonlama hamkorlikni kengaytirish, jumladan, sanoat kooperatsiyasi, energetika, kimyo sanoati, qishloq xo‘jaligi, ta’lim kabi sohalarda muhim qo‘shma loyihalarni amalga oshirish masalalari muhokama qilindi.

Shuningdek, O‘zbekiston bilan Perm viloyati o‘rtasidagi ishbilarmonlik aloqalarini faollashtirish, xususan, yirik ishlab chiqarish korxonalari, ilmiy-tadqiqot muassasalari va sarmoyaviy tashkilotlar o‘rtasidagi hamkorlikni mustahkamlash muhimligi ta’kidlandi.

Forum doirasida hukumat rahbari China Energy Engineering Corporation (CEEC) bosh direktori Ni Chjen bilan ham uchrashuv o‘tkazdi.

Tomonlar elektr energiyasi ishlab chiqarish, qayta tiklanadigan energiya manbalarini rivojlantirish, zamonaviy muhandislik va qurilish texnologiyalarini joriy etish bo‘yicha hamkorlik istiqbollarini atroflicha ko‘rib chiqdilar. Shuningdek, kompleks texnologik obyektlarni qurish, kadrlar tayyorlash va raqamlashtirishni kengaytirish bo‘yicha hamkorlik masalalariga ham alohida e’tibor qaratildi.

• Bosh vazir
• O‘zbekiston
• neft