Sirdaryo viloyatida ota va o‘g‘il, shuningdek ularning qo‘shnisi quduqni tozalash paytida zaharli gaz bilan zaharlanish natijasida vafot etdi. Yana ikki fuqaro hushidan ketib, kasalxonaga yotqizildi.

22-may kuni Sayxunobod tumanidagi “Do‘stlik” mahallasida 67 yoshli fuqaro besh metr chuqurlikdagi quduqqa tushib, o‘zini yomon his qilgan. Uning 39 yoshli o‘g‘li, keyin esa 46 yoshli qo‘shnisi uni olib chiqish uchun pastga tushdi. Uchalasi ham gaz zaharlanishidan vafot etdi. Jasadlarni voqea joyiga kelgan Sayxunobod tumani favqulodda vaziyatlar bo‘limi qutqaruvchilari olib ketishdi.

Bundan tashqari, qutqaruvchilar 25 va 49 yoshli yana ikki kishini olib ketishdi, ular ham jabrlanuvchilarga yordam berish uchun quduqqa tushib, hushidan ketishgan. Tezkor tibbiy yordam tufayli ularning hayoti saqlanib qoldi. Ushbu hodisa bo‘yicha tergovga qadar tekshiruv o‘tkazilmoqda.

• O‘zbekiston
• Sirdaryo