Ukraina Prezidenti Vladimir Zelenskiy bugun, 28-may kuni Germaniyaga yetib bordi. Uning samolyoti Berlinga qo‘ngan. Bu haqda “Deutsche Welle” xabar bermoqda.

Germaniyada harbiy sharaf bilan qabul qilingan Zelenskiy allaqachon Germaniya kansleri Fridrix Mers bilan uchrashgan.

Germaniya hukumatining rasmiy vakili Stefan Korneliusning ma’lum qilishicha, Vladimir Zelenskiyning tashrifi chog‘ida “Germaniyaning Ukrainani qo‘llab-quvvatlashi va Rossiya bilan urushda o‘t ochishni to‘xtatish harakatlari” muhokama qilinadi.

Mersning partiyasi va muxolifat kanslerni Rossiya bosqinidan o‘zini himoya qilayotgan Ukrainaga TAURUS qanotli raketalarini yetkazib berish bo‘yicha qaror qabul qilishga chaqirmoqda.

Germaniyaga tashrifi oldidan Vladimir Zelenskiy tinchlik muzokaralari bo‘yicha oliy darajadagi – ham ikki tomonlama, ham uch tomonlama, xususan, Rossiya va AQSh Prezidentlari Putin va Tramp ishtirokida uchrashuvlarga tayyor ekanini aytgan.

“Biz “Tramp – Putin – men” formatiga tayyormiz, “Tramp – Putin”, “Tramp – Zelenskiy”, keyin esa uchchalamiz formatiga tayyormiz. Aytmoqchimanki, bu tarqoq uchrashuvlar emas”, – degan Zelenskiy.

Ukraina Prezidentining qo‘shimcha qilishicha, Amerika va Rossiya tomonlari Kiyevning bunday tayyorligidan xabardor bo‘lgan.

• Germaniya
• Tashrif
• Ukraina
• Zelenskiy