Sadir Japarov sobiq davlat rahbari Almazbek Atambayevga nisbatan chiqarilgan sud qaroriga izoh berar ekan, uni afv etishga tayyorligini aytdi. U bu haqda “Kabar” axborot agentligiga bergan intervyusida ma’lum qildi.

Sadir Japarov sud qarorlariga aralashmaganini va aralashmoqchi ham emasligini ta’kidlab, sudning qarori qanday bo‘lishidan qat’iy nazar, unga bo‘ysunish kerakligini aytdi.

“Agar sud tomonidan chiqarilgan qarorni noqonuniy deb hisoblasangiz, yuqori instansiyalarga murojaat qiling, Oliy sud nuqta qo‘ysin. Sud qarorini hech kim o‘zgartira olmaydi. Mening ham bunga haqqim yo‘q”, — dedi u.

Shu bilan birga, Japarov Atambayev mamlakatga qaytgan taqdirda, hibsga olinishi yoki olinmasligi haqida gapirar ekan, o‘zining afv etish huquqi borligini eslatdi.

“Mening boshqa bir huquqim bor — amnistiya huquqi. Agar tegishli ariza bilan murojaat qilishsa, amnistiya berishim mumkin. Koy-Tash voqeasidan buyon olti yil o‘tdi. Ehtiroslar allaqachon bosilgan. Menimcha, sudlar bunchalik qattiq bo‘lmasligi ham mumkin edi. Albatta, bu mening sudlarga tiqishtiradigan fikrim emas, balki shaxsiy, fuqarolik fikrim. Menimcha, probatsiya yoki jarima bilan cheklanishsa yaxshi bo‘lardi”, — deya qo‘shimcha qildi amaldagi prezident.

Ma’lumot uchun, Atambayev 2023-yil fevralida davolanishi uchun Ispaniyaga ketgan va o‘shandan beri Qirg‘izistonga qaytib kelmagan.

• Avf
• Japarov
• Prezident
• Qirg‘iziston