O‘zbekiston aprel oyi yakunlari bo‘yicha yana dunyodagi eng yirik oltin sotuvchisi bo‘ldi. Bu haqda Jahon oltin kengashi xabar berdi.

O‘tgan oy jahon Markaziy banklari jami 12 tonna oltin sotib oldilar, bu mart oyiga nisbatan 12 foizga kamaydi va o‘tgan yilgi o‘rtacha ko‘rsatkichdan ancha past. 

Tahlilchilar talabning pasayishini yil boshida rekord darajaga etgan oltin narxlarining ko‘tarilishi bilan bog‘lashdi. Jahon oltin kengashi ta’kidlashicha, Markaziy banklarning qarorlari ko‘pincha strategik xususiyatga ega, narxlar bozordagi faoliyatni vaqtincha sovutishi mumkin.

Aprel oyida eng katta xaridni Polsha milliy banki amalga oshirdi. Uning zaxiralari 12 tonnaga to‘ldirilib, 509 tonnaga yetdi, bu hatto Yevropa Markaziy bankining (507 tonna) zaxiralaridan ham oshib ketdi. Yil boshidan beri Polsha 61 tonna oltin sotib oldi.

Shuningdek, yirik xaridorlar ro‘yxatiga Chexiya (3 tonna), Xitoy, Turkiya, Qirg‘iziston (2 tonna), Qozog‘iston va Iordaniya (bir tonna) Markaziy banklari kiritilgan.

Boshqa davlatlar zaxiralarni ko‘paytirayotgan bir paytda, O‘zbekiston ularni sotishda davom etmoqda. Aprel oyida O‘zbekiston yana 11 tonna oltin sotdi va ketma-ket uchinchi oy davomida sotuvlar bo‘yicha yetakchi bo‘lib qoldi. 

• Oltin
• O‘zbekiston