Mask X platformasida prezident Donald Trampning nomi moliyachi Jeffri Epshteyn ishiga doir hujjatlarda qayd etilgani sababli, bu hujjatlar hanuzgacha ommaga e’lon qilinmaganini yozdi.

Jeffri Epshteyn voyaga yetmaganlarga nisbatan jinsiy xarakterdagi jinoyatlarda ayblangan edi.

“Mask menga bir necha oy oldin qarshi chiqishi kerak edi. Men taklif qilayotgan byudjet bo‘yicha qonun loyihasi ko‘plab afzalliklarga ega. Men oldingi ma’muriyatning xatolarini tuzatmoqdaman”, — deb yozdi AQSh prezidenti.

Bundan tashqari, Mask Trampning SpaceX bilan tuzilgan davlat shartnomalari bekor qilinishi haqidagi gaplari ortidan o‘zining Dragon kosmik kemalarini darhol ekspluatatsiyadan chiqarishni boshlashini bildirdi. Ammo oradan bir necha soat o‘tib, u bu fikridan qaytganini ma’lum qildi.

Shuningdek, Mask X’da bir foydalanuvchining tvitini repost qildi. Unda “Tramp va Mask mojarosida men Mask tarafidaman” deb yozilgan edi. Tvitda, shuningdek, Trampga impichment e’lon qilinishi, AQSh vitse-prezidenti Jey Di Vens esa uning o‘rnini egallashi kerakligi qayd etilgandi. Mask bu postga “Ha!” deb javob berdi.

Shu bilan birga, Mask Tramp joriy qilayotgan savdo tariflari joriy yilning yilning ikkinchi yarmidayoq Qo‘shma Shtatlarda iqtisodiy inqirozga olib kelishini bildirdi.

Mask X platformasida Qo‘shma Shtatlarda “uchinchi siyosiy partiya” tuzish zarurligi bo‘yicha so‘rovnoma ham joylashtirdi. So‘rovnomada allaqachon 740 ming kishi qatnashdi va ularning 83 foizi “Uchinchi partiya” tashkil etilishini qo‘llab-quvvatladi.

“Tramp prezident sifatida yana 3,5 yil qoladi, men esa bu yerda yana 40 yildan ortiq qolaman”, — deb yozdi Tesla rahbari so‘rovnoma ostida.

Tramp va Mask o‘rtasidagi mojaro ortidan Ilon Maskka tegishli Tesla kompaniyasi aksiyalari narxi 15 foizga tushib ketdi, Donald Trampning TMTG mediakompaniyasi aksiyalari qiymati esa 8 foizga pasaydi.

• AQSh
• Aksiya
• Ilon_Mask
• Tesla
• Tramp