AQSh prezidenti Donald Tramp, may oyi o‘rtalarida Suriyaning yangi yetakchisi Ahmad ash-Sharaa bilan uchrashuvi oldidan bergan va’dasiga muvofiq, Qo‘shma Shtatlarning Suriyaga nisbatan sanksiyalarini bekor qilish to‘g‘risidagi farmonni imzoladi.

Oq uyning ma’lum qilishicha, bu qaror “barqarorlik va tinchlik sari yo‘ldagi muhim qadam” hisoblanadi.

Shu bilan birga, Rossiyaga qochib ketgan Suriyaning sobiq prezidenti Bashar Asad, uning oilasi a’zolari va ag‘darilgan rejim tarafdorlariga nisbatan sanksiyalar esa o‘z kuchida qolmoqda.

Oq uy bayonotiga ko‘ra, AQSh yangi Suriya hukumati harakatlarini, jumladan, “Isroil bilan munosabatlarni normallashtirishga qaratilgan aniq choralarni” kuzatib boradi.

Muvaqqat Suriya hukumatining tashqi ishlar vaziri Asad al-Shiboniy sanksiyalarning bekor qilinishi Suriya iqtisodiyotini tiklash yo‘lidagi to‘siqlarni bartaraf etishini va mamlakatni xalqaro hamjamiyat uchun ochishini bildirgan.

AQSh Moliya vaziri Skott Bessent bayonotida farmon Suriya xalqiga “Bashar Asadning zolim rejimi ag‘darilgach, hayotni yangidan boshlash imkonini beradi”, – deyiladi.

“Bugungi qarorlar Suriya iqtisodiyotini global savdoga qayta bog‘lash va mamlakat infratuzilmasini tiklash imkonini yaratadi”, – degan u.

• AQSh
• Sanksiya
• Suriya
• Tramp