Joriy yilning 1-iyul kuni soat 20:50 larda Andijon viloyati Xo‘jaobod tumani “Yuksalish” mahallasidagi xonadonda janjal bo‘layotganligi haqida 102 qisqa raqamiga kelib tushgan xabar bo‘yicha hudud profilaktika inspektori katta leytenant A.Abduvaliyev, mahalla raisi A.Mamataliyev bilan birga voqea joyiga yetib borishgan.

Aniqlanishicha, 1960-yilda tug‘ilgan fuqaro Xolbozorov Yunusali Tumarovich mast holda o‘z oila a’zolariga xo‘jalik pichog‘i bilan tahdid solayotgan bo‘lgan. Hujumchini zararsizlantirish jarayonida Y. Xolbozorov qo‘lidagi pichoq bilan katta leytenant A. Abduvaliyevning ko‘krak qismiga zarba berib, og‘ir tan jarohati yetkazgan.

Olgan jarohati natijasida ko‘rsatilgan yordamga qaramasdan A. Abduvaliyev shifoxonaga olib ketilayotgan vaqtida vafot etgan.

Holat yuzasidan O‘zbekiston Respublikasi JKning 97-moddasi 2-qismi “g” bandi bilan jinoyat ishi qo‘zg‘atilgan.

Hozirda gumondor Y. Xolbozorov voqea joyidan yashiringan, uni aniqlash va qo‘lga olish bo‘yicha tezkor-qidiruv tadbirlari amalga oshirilmoqda.

“Hurmatli fuqarolar! Ushbu shaxs haqida biron-bir ma’lumotga ega bo‘lsangiz zudlik bilan yaqin oradagi ichki ishlar organlariga yoki 102 qisqa raqamiga murojaat qilishingiz so‘raladi. Ma’lumot bergan fuqaroning shaxsi sir saqlanishi kafolatlanadi”, – deya xabar bermoqda Andijon viloyati IIB axborot xizmati.

• Andijon
• IIB
• xabar