Ular odam o‘ldirish va suiqasd kabi bir qator og‘ir jinoyatlarda ayblanmoqda.

Rossiya Tergov qo‘mitasi Yekaterinburgda 27-iyun kuni o‘tkazilgan reyd doirasida hibsga olingan shaxslar – Mazahir Safarov, Akif Safarov, Ayaz Safarov, Ahliman Ganjiyev, Shahin Lalayev va Bakir Safarovga rasmiy ayblov qo‘yilganini e’lon qildi.

Ma’lum qilinishicha, tergovchilar ularni Yekaterinburgda 2001-yilda Yunus Pashayevni o‘ldirish, 2010-yilda Fehruz Shirinovga suiqasd qilish va 2011-yilda Ikram Gadjiyevni o‘ldirish kabi og‘ir jinoyatlarda ayblamoqda. Ushbu jinoyatlar sababi biznesdagi ta’sir doiralarini bo‘lishish va shaxsiy adovat bilan izohlanmoqda.

“Ularning besh nafariga oldindan til biriktirib, buyurtma asosida odam o‘ldirish va suiqasd moddalari bo‘yicha ayblov qo‘yilgan. Barcha gumonlanuvchilar Rossiya fuqarolari bo‘lib, ulardan biri jinoyat joyida ko‘rsatma berib, sheriklarini fosh qildi”, – deyiladi Rossiya Tergov qo‘mitasi bayonotida.