“Xabaringiz bor, Laziz Mullajonov O‘zbekiston milliy terma jamoasi a’zosi, Parij-2024 Olimpiya o‘yinlari oltin medal sohibi hisoblanadi.

Ijtimoiy tarmoqlarda bokschida doping moddasi aniqlangani va buning natijasida Parij-2024 Olimpiya o‘yinlari oltin medali natijasi bekor qilinishi to‘g‘risida tasdiqlanmagan xabarlar tarqalmoqda.

O‘zbekiston boks federatsiyasi shuni ma’lum qiladiki, bugungi kunda Mullajonov professional boksda o‘z faoliyatini davom ettirmoqda. Sportchimiz doimiy ravishda doping qoidalariga rioya qilib kelgan va doping testlari natijalari har doim manfiy chiqqan bo‘lib, joriy yilning 11-iyun kuni Xalqaro doping qoidalariga ko‘ra, sportchimizdan doping testi olingan va uning natijalariga ko‘ra, taqiqlangan moddalar borligi aniqlanganligi yuzasidan Xalqaro doping agentligi tomonidan axborot xati taqdim qilindi.

Sportchimiz Parij-2024 Olimpiya o‘yinlaridan so‘ng, 2024-yil 19-noyabr kuni Farg‘ona shahridagi xususiy shifoxonada soch ko‘chirib o‘tkazish amaliyotini o‘tkazgani sababli, 4 bosqichli operatsiya amaliyotida va operatsiyadan keyingi muolajalarda shifoxona tomonidan taqdim qilingan davolanish uchun dori vositalarini qabul qilganligi va ushbu dori vositalarida ayrim taqiqlangan doping moddalari bo‘lishi mumkinligi taxmin qilinmoqda.

O‘zbekiston boks federatsiyasi va Laziz Mullajonov tomonidan Xalqaro test agentligiga ushbu masala yuzasidan kerakli barcha hujjatlar taqdim qilingan bo‘lib, hozirda yakuniy qaror chiqishi kutilmoqda.

Ijtimoiy tarmoqlarda vakilimiz doping qoidalarini buzganligi sababli Parij-2024 Olimpiya o‘yinlari oltin medali natijasi bekor qilinishi to‘g‘risida xabarlar asossiz ekanligi va yuqoridagi holat Olimpiya o‘yinlaridagi natijasiga hech qanday ta’sir ko‘rsatmasligini ma’lum qilamiz.

Shu o‘rinda OAV vakillaridan ma’lumotlarni tekshirmasdan O‘zbekiston boks federatsiyasi va bevosita Mullajonov bilan bog‘lanmasdan oldin asossiz ma’lumotlarni tarqatmasliklarini so‘raymiz” – deyiladi federatsiyaning rasmiy axborotida.

• Bayonot
• Boks
• Sport
• korxona va tashkilotlar