Rossiya Qurolli kuchlari Bosh shtabi boshlig‘i Valeriy Gerasimov ma’lum qilishicha, Rossiya 2025-yil martidan buyon Ukrainaning 149 ta aholi punkti va 3,5 ming kvadrat kilometrdan ortiq hududini bosib olgan.

Gerasimovning so‘zlariga ko‘ra, Rossiya armiyasi Lugansk viloyatining 99,7 foizini, Donetsk viloyatining 79 foizini, shuningdek, Zaporojye viloyatining 74 foizini va Xerson viloyatining 76 foizini okkupatsiya qilgan.

Rossiya armiyasi bahor hamda yoz mavsumida Ukrainadagi 76 ta strategik inshootga zarba bergan. Nishonlar orasida raketa va dron ishlab chiqaruvchi korxonalar ham mavjud. Bosh shtab boshlig‘i Rossiya armiyasining maqsadi hujumkor harakatlarni davom ettirish ekanini ta’kidladi.

Shu yil 28-avgust kuni Kiyevga qilingan hujum ham tilga olingan. Buning oqibatida besh qavatli turar joy binosi vayron bo‘lgan va 25 kishi vafot etgan. Shu bilan birga, “Spetsoboronmash” va “Kiyev radio zavodi” ham aynan 28-avgust kuni nishonga olingan.

Amerika Qo‘shma Shtatlari prezidenti Donald Tramp va Ukraina yetakchisi Vladimir Zelenskiy 18-avgustda uchrashgan edi. Shundan so‘ng Vladimir Putin va Zelenskiy o‘rtasida urushni tugatish borasida muzokaralar o‘tkazilishi aytilgandi. Biroq uchrashuv haligacha bo‘lib o‘tmadi.

Ukraina prezidentining ofisi rahbari Andriy Yermak AQSh prezidentining maxsus vakili Stiv Uitkoff bilan 29-avgust kuni bo‘lib o‘tgan uchrashuv chog‘ida, Ukraina Rossiya bilan rahbarlar darajasida uchrashuvga tayyorligini bildirdi. Yermak Ukraina muzokara stolida g‘alabaga erishishiga ishonishini ta’kidladi.

Rossiya tashqi ishlar vaziri Sergey Lavrov esa Kiyev oldindan qo‘yilgan talablarni bajarmaguncha prezidentlar darajasida uchrashuv rejalashtirilmasligini aytdi.

• AQSh
• Rossiya