10-sentyabr kuni tongda butun Fransiya bo‘ylab “Bloquons Tout” (“Hammani to‘samiz”) harakati tomonidan uyushtirilgan norozilik namoyishlari boshlandi. Namoyishchilar avtomagistrallarni to‘sib, temir yo‘l transporti ishini izdan chiqargan. Bu haqda BBC nashri xabar bermoqda.

Ichki ishlar vaziri Bruno Retayoga ko‘ra, mamlakat bo‘ylab 80 ming, jumladan Parijda 6 ming xavfsizlik xodimi joylashtirilgan. Fransiya ommaviy axborot vositalari namoyishlarda 100 minggacha odam ishtirok etishini kutmoqda.

“Biz butun mamlakat bo‘ylab aksiyalarga olib keladigan safarbarlikka duch kelish xavfi ostidamiz”, – dedi Retayo.

Uning ma’lumotlariga ko‘ra, namoyishlarda tartibsizlikni yuzaga keltirgan 250 ga yaqin odam qo‘lga olingan.

Kecha tunda Parijda ham alohida aksiyalar o‘tkazilgan, biroq vazir tafsilotlarni keltirmagan. U yerda 1000 ga yaqin namoyishchi, ularning ko‘pchiligi niqob yoki balaklavada, Gar-dyu-Nor temir yo‘l vokzalida politsiya bilan to‘qnashgan.

“Ba’zilari vokzalga kirishga uringan, biroq politsiyachilar ko‘zdan yosh oqizuvchi gaz qo‘llab, ularni to‘xtatgan”, – deb xabar bermoqda Fransiya OAV.

9-sentyabr kuni Fransiya prezidenti Emmanuel Makron mamlakat mudofaa idorasini boshqargan Sebastyan Lekornyani yangi bosh vazir etib tayinlagan.

• Fransiya
• Namoyish