Farg‘ona viloyati Marg‘ilon shahrida tez yordam mashinasi avtohalokatga uchradi. Holat yuzasidan Respublika tez tibbiy yordam markazi ma’lumot berdi.

Xabarga ko‘ra, holat 25-sentyabr kuni kechki soat 22:15 da Marg‘ilon shahar hududida Respublika tez tibbiy yordam markazi Farg‘ona viloyati filialining Marg‘ilon shahar tez tibbiy yordam stansiyasiga tegishli maxsus avtotransport vositasi chaqiruvni bajarib qaytish jarayonida sodir bo‘lgan.

3-oilaviy poliklinika qarshisida katta tezlikda harakatlangan Gentra beton to‘siqdan o‘tib, qarama-qarshi yo‘nalishga chiqib ketishi oqibatida tez tibbiy yordam mashinasiga urilgan.

Yo‘l-transport hodisasi oqibatida tez tibbiy yordam shifokori va feldsheri yengil tan jarohat olib, zarur tibbiy yordam ko‘rsatilgan. Shuningdek, avtotransport vositalari texnik jihatdan shikastlangan.

Hodisa yuzasidan huquqni muhofaza qiluvchi organlar tomonidan tegishli tartibda surishtiruv ishlari olib borilmoqda.

• Farg‘ona
• Marg'ilon
• Tez tibbiy yordam
• YTH