So‘nggi haftalarda Rossiyada benzin tanqisligi keskinlashdi. Mamlakatning turli hududlarida yoqilg‘i quyish shoxobchalarida uzun navbatlar kuzatilmoqda, ba’zilarida esa benzin umuman mavjud emas.

Buning asosiy sababi – Ukraina dronlarining neftni qayta ishlash zavodlariga uyushtirgan hujumlari. Reuters’ning yozishicha, hujumlar oqibatida kamida yettita zavod faoliyatini to‘xtatgan. Bu ishlab chiqarish hajmining pasayishiga va ichki bozorda taqchillikka olib keldi.

Shuningdek, hukumat benzin eksportiga vaqtincha taqiq qo‘ydi. Ammo bu choralar ichki ta’minot muammolarini bartaraf eta olmadi. Ko‘plab mustaqil AYoQShlar ta’minotsiz qolib, yopilmoqda.

AI-92 markali benzinning narxi rekord darajaga – tonnasi 73 200 rublgacha ko‘tarildi. Qrimda esa narxlar muzlatilib, benzin sotish cheklangan, haydovchilarga bir martada 20 litrdan ortiq benzin berilmayapti.

• Benzin
• Rossiya
• Ukraina