“O‘zenergoinspeksiya” Samarqand viloyati hududiy boshqarmasi, viloyat prokuraturasi va IIB hamkorligida o‘tkazilgan nazorat tadbirida, Samarqand shahrida “B.Q.S.” MChJga qarashli ko‘p qavatli uy binosi (21 ta xonadon) loyiha hujjatlari rasmiylashtirmasdan tarmoqqa to‘g‘ridan to‘g‘ri ulanib, tabiiy gazdan noqonuniy foydalanib kelayotganligi aniqlangan. Bu haqda Energetika vazirligi xabar berdi.

Ushbu qoidabuzarlik natijasida, dastlabki hisob-kitoblarga ko‘ra, gaz ta’minoti korxonasiga 3 milliard 560 million so‘mlik zarar yetkazilganligi ma’lum bo‘ldi.

Shuningdek, “O‘zenergoinspeksiya” tomonidan o‘tkazilgan nazorat tadbiri davomida Toshkent viloyatining Toshkent tumanida joylashgan “YATT” T.J.ga qarashli savdo do‘koni elektr ta’minoti korxonasi bilan shartnoma tuzmasdan, tarmoqqa o‘zboshimchalik bilan ulangan holda elektr energiyasidan noqonuniy foydalanib kelayotganligi aniqlangan.

Mazkur qoidabuzarlik natijasida, dastlabki hisob-kitoblarga ko‘ra, elektr ta’minoti korxonasiga 173,4 mln so‘mlik zarar yetkazilgan.

Hozirda ushbu holatlar yuzasidan huquqni muhofaza qiluvchi organlar tomonidan tergovga qadar tekshiruv ishlari olib borilmoqda.

• Elektr energiyasi
• Energetika_vazirligi
• Gaz
• MCHJ
• Qoidabuzarlik
• Samarqand