Politico nashrining xabar berishicha, AQSh prezidenti bu haqda Yaponiya sari parvoz chog‘ida Air Force One samolyoti bortida jurnalistlar bilan suhbatda aytgan.

“Donald Tramp o‘zining uchinchi muddati Qo‘shma Shtatlar Konstitutsiyasiga zid ekanini ta’kidlab, bu lavozim uchun asosiy nomzodlar sifatida vitse-prezident Jey Di Vens va davlat kotibi Marko Rubioni ko‘rayotganini bildirdi”, deya yozmoqda Politico.

Matbuot vakillari Trampdan, yaqinda Oq uyning sobiq strategi Stiv Bennon ilgari surgan “uchinchi muddatga nomzod bo‘lish” g‘oyasi haqidagi fikrini so‘rashganida, Tramp “Men buni mamnuniyat bilan qilgan bo‘lardim. Mening natijalarim tarixdagi eng yaxshilaridan. Aslida bu haqida o‘ylamaganman. Qo‘shma Shtatlarda prezidentlikka munosib boshqa yaxshi odamlar ham bor”, – deya javob bergan.

Jurnalistlar undan “Bu odamlar kimlar?” deb so‘rashganda, Tramp orqada turgan davlat kotibi Rubioga ishora qilib, “Bizda ajoyib odamlar bor, ulardan biri mana shu yerda turibdi. Jey Di Vens ham yaxshi inson. Zo‘r vitse-prezident. Menimcha, hech kim bu ikki kishiga qarshi nomzodini qo‘ymaydi”, – degan.

• AQSh
• Prezident
• Tramp