Buxorodagi Sitorai Mohi Xosa tarixiy majmuasida olib borilgan ishlarning ahvoli o‘rganilganida majmuada restavratsiya ishlari noto‘g‘ri olib borilgani oqibatida uning badiiy bezaklari, naqshlari, koshinlari nobud qilinib, tarixiy va badiiy qiymatiga jami 28 mlrd. so‘mlik zarar yetkazilgani aniqlangan.

Bu haqda Senatning yigirma uchinchi yalpi majlisida ma’lum qilindi.

Qayd etilishicha, bundan tashqari Buxoro, Qashqadaryo viloyatlari hamda Toshkent shahridagi moddiy-madaniy meros obektlariga juda katta miqdorda zarar yetkazilgan, davlat muhofazasiga olingan ayrim arxeologik obektlar esa yo‘q bo‘lib ketgan.

Yalpi majlisda mavjud muammolarning qonuniy yechimini belgilash uchun “Moddiy madaniy meros obektlarini muhofaza qilish kuchaytirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonun senatorlar tomonidan muhokama qilindi va ma’qullandi.

• Buxoro
• Senat
• Tarix
• xabar