O‘zbekiston Respublikasi fuqarosi O‘tkirov Javohir Davronovichga nisbatan qo‘zg‘atilgan jinoyat ishi bo‘yicha sud hukmi e’lon qilindi. U Rossiya Federatsiyasi Jinoyat kodeksining 205.5-moddasi 2-qismi, 30-moddasi 1-qismi, 205-moddasi 2-qismi “a” bandi, 223.1-moddasi 3-qismi, 222.1-moddasi 4-qismi hamda 30-moddasi 1-qismi, 223.1-moddasi 3-qismida nazarda tutilgan jinoyatlarni sodir etishda ayblangan.

Aniqlanishicha, 2023-yil yanvar oyida erkak Rossiya Federatsiyasida taqiqlangan “Islom davlati” terrorchilik tashkiloti manfaatlari yo‘lida harakat qilishga tayyorligini bildirgan videomurojaat yozib olgan.

Sud hujjatlariga ko‘ra, u tashkilot yetakchisining ko‘rsatmalari asosida Rossiya hududida terrorchilik hujumi amalga oshirilishi mumkin bo‘lgan aholi punktini tanlash, nishon bo‘yicha razvedka o‘tkazish hamda qo‘lbola portlovchi qurilma tayyorlash uchun zarur binolarni ijaraga olish majburiyatini olgan.

2023-yil 23-sentyabr kuni u O‘zbekistondan Rossiyaga kelib, Stavropol shahrini tanlaganini ma’lum qilgan. Shundan so‘ng u bir nechta obyektlarning foto va video tasvirlarini tayyorlab, ularni tashkilot vakillariga yuborgan.

Keyinchalik unga ehtimoliy hujum manzili sifatida Stavropol o‘lkasi hukumat binosi ko‘rsatilgan. 2023-yil dekabr oyida u portlovchi moslama tayyorlash uchun zarur bo‘lgan butlovchi qismlarni xarid qilib, ularni yashirin joyda saqlagan.

2023-yil 18-dekabr kuni ayblanuvchi qo‘lga olingan. Sud hukmiga ko‘ra, erkak aybdor deb topilib, unga 20 yil muddatga ozodlikdan mahrum qilish jazosi tayinlangan. Jazoning dastlabki 5 yilini turmada, qolgan qismini esa qat’iy tartibli koloniyada o‘tashi belgilangan, shuningdek, 1 000 000 rubl miqdorida jarima ham qo‘llanilgan.

Hukm qonuniy kuchga kirmagan bo‘lib, tomonlar Apellyatsiya harbiy sudiga shikoyat qilinishi mumkin.

• O‘zbekiston
• Rossiya
• Terrorchilik