Navoiy viloyatining Qiziltеpa tumanida jazo muddatini o‘tayotgan diniy olim chuqurlashtirilgan tibbiy muolajalar uchun Toshkentdagi “Sangorod” deb nomlanuvchi jazoni ijro etish boshqarmasi shifoxonasiga etap qilingan.

Bu haqda inson huquqlari “Ezgulik” jamiyati rahbari Abdurahmon Tashanov olimning yaqinlariga asoslangan holda xabar berdi.

“Mubashshir Ahmad (Alishеr Tursunov)  O‘zbеkiston Rеspublikasi Ichki ishlar va Sog‘liqni saqlash vazirligi tomonidan jazo muddatini qamoqda o‘tkazishga monelik qiluvchi kasallik — qandli diabetning og‘ir formasi bilan og‘rigan.

O‘zbekiston Respublikasi IIVning jazoni ijro etish Departament insonparvarlik va gumanizm tamoyillari asosida uning jazo muddatini qamoqda o‘tkazish bilan bog‘liq chorani yengilrog‘i bilan almashtirish bo‘yicha sudga taqdimnoma kiritadi, degan umiddamiz”, – deb yozmoqda huquq himoyachisi.

Ma’lumot uchun, Mubashshir Ahmadning advokatlari bundan bir oy avval ham mijozining ahvoli keskin yomonlashib borayotgani sababli ortiq jazo muddatini o‘tolmasligi haqida bayonot bilan chiqqan edi. Ammo keyinroq Oliy majlisning Inson huquqlari bo‘yicha vakili (ombudsman) Navoiydagi 5-sonli jazoni ijro etish koloniyasiga tashrif qilib, mahkum Alisher Tursunovning tibbiy yordam ko‘rsatilishidan shikoyati yo‘qligini qayd etgan.

• Abdurahmon Tashanov
• xabar