“O‘zbekiston elchixonasi va Migratsiya agentligi hamkorligida og‘ir moddiy qiyinchilikka tushib qolgan bir guruh hamyurtlarimiz vatanga qaytarildi”, – deb xabar qilmoqda “Dunyo” agentligi.

Aniqlanishicha, fuqarolarning mushkul vaziyatlarga tushib qolishiga turli holatlar sabab bo‘lgan. Kimdir hujjatlarini yo‘qotgani bois ishga joylasha olmagan bo‘lsa, boshqa birov mehnat faoliyati davomida og‘ir xastalikka chalingan.

Jumladan, hujjatlarini yo‘qotib, ishsiz va og‘ir moliyaviy ahvolga tushib qolgan xorazmlik Y.A. politsiya organlari tomonidan ushlanganidan so‘ng, unga zudlik bilan konsullik-huquqiy yordam ko‘rsatilgan. Unga Migratsiya agentligi bilan hamkorlikda aviachipta va vaqtinchalik qaytish sertifikati rasmiylashtirilib, vatanga qaytariladi.

Hujjatlari o‘g‘irlanib mushkul vaziyatga tushib qolgan qashqadaryolik fuqaroga ham o‘z vaqtida yordam ko‘rsatilib, O‘zbekistonga qaytishi ta’minlangan.

Lodz voyevodaligi Velyun shahrida yurak xuruji oqibatida vafot etgan namanganlik fuqaroning jasadi Migratsiya agentligi bilan hamkorlikda O‘zbekistonga qaytarilgan.

Polshadagi logistika kompaniyasida ishlagan va xizmat safari davomida Estoniyaning Tartu shahrida insultga uchragan toshkentlik Z.M.ga ham har tomonlama amaliy yordam ko‘rsatilib, u O‘zbekistonning Polsha va Latviyadagi elchixonalari, Migratsiya agentligi hamda “Uzbekistan Airways” aviakompaniyasi ko‘magida maxsus tibbiy jihozlar va shifokorlar kuzatuvida “Riga–Toshkent” yo‘nalishi bo‘yicha vatanga olib kelinib, shifoxonaga joylashtirilgan.

Shuningdek, ish joyida baxtsiz hodisa natijasida oyog‘i singan andijonlik T.I.ga birinchi tibbiy yordam ko‘rsatilib, Migratsiya agentligi bilan hamkorlikda O‘zbekistonga qaytarilishi ta’minlanadi.

Bundan tashqari, ish joyida yiqilib, miya chayqalishi oqibatida kasalxonaga joylashtirilgan namanganlik N.A.ning holati doimiy nazoratga olinib, unga zarur tibbiy muolajalarni olishda amaliy yordam ko‘rsatilgan.

• Moddiy yordam
• O‘zbekistonlik
• Polsha
• migrant