Andijon viloyati Baliqchi tumanida 9 yoshli bolani ZIL yuk mashinasi urib ketdi. Bu haqda Andijon viloyati Yo‘l harakati xavfsizligi boshqarmasi xabar berdi.

Ma’lum qilinishicha, 24-fevral kuni soat 15:56 da, Baliqchi tumani “Eski Markaz” MFY hududidan o‘tgan D-105 avtomobil yo‘lining “Farg‘ona halqa yo‘li” 103-kilometrida, 2002-yilda tug‘ilgan A.J. o‘zining “Zil 130” rusumli yuk transport vositasini boshqarib kelayotgan bo‘lgan va oldinda tartibga solingan chorrahadagi piyodalar o‘tish joyidan keskin yugurib chiqqan piyoda, 2017-yilda tug‘ilgan H.M.ni urib yuborgan. Boshqaruvni yo‘qotgan haydovchi chorrahada to‘xtab turgan Cobalt rusumli transport vositasi bilan to‘qnashgan.

Ushbu yo‘l transport hodisasi oqibatida voyaga yetmagan piyoda H.M. olgan tan jarohatlari bilan shifoxonada ko‘rsatilgan tibbiy muolajalariga qaramasdan vafot etgan.

Mazkur holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilib, tergov harakatlari olib borilmoqda.

• Andijon
• YHXB
• YTH
• baliqchi
• yuk mashinasi