O‘zbekiston Tashqi ishlar vazirligi fuqarolarga Yaqin Sharq yo‘nalishida rejalashtirilgan ziyorat, tijorat, dam olish hamda boshqa turdagi xorijiy tashriflarni vaziyat barqarorlashguniga qadar vaqtincha kechiktirib turish tavsiya qildi.

Xabarga ko‘ra, Yaqin Sharq mintaqasidagi vaziyatning keskinlashuvi hamda ayrim davlatlar tomonidan havo hududidan foydalanishga joriy etilgan vaqtinchalik cheklovlar sabab xalqaro aviaqatnovlar harakatida o‘zgarishlar kuzatilishi mumkin. Bu esa reyslarning bekor qilinishi yoki kechiktirilishi, tranzit yo‘nalishlarining yopilishi hamda boshqa tashkiliy muammolarga olib kelishi mumkin.

“Shu munosabat bilan fuqarolarga xavfsizlikni ta’minlash hamda o‘z qonuniy manfaatlarini himoya qilish maqsadida Yaqin Sharq yo‘nalishidagi ziyorat, tijorat, dam olish va boshqa xorijiy safarlarni vaziyat barqarorlashguniga qadar vaqtincha kechiktirib turish tavsiya etiladi”, – deyiladi O‘zbekiston TIV xabarida.

Chet elda bo‘lib turgan O‘zbekiston fuqarolariga vaziyatga nisbatan ehtiyotkor va hushyor bo‘lish, gavjum joylarga bormaslik, mahalliy qonun-qoidalarga qat’iy rioya qilish hamda O‘zbekiston diplomatik vakolatxonalari va konsullik muassasalari bilan doimiy aloqada bo‘lib turish tavsiya qilindi.

Shuningdek, fuqarolardan xorijga safarlarni rejalashtirishda rasmiy manbalarda e’lon qilinayotgan yangiliklarni muntazam kuzatib borish so‘ralgan.

• Ogohlantirish
• Tashqi ishlar vazirligi
• Xorij
• xabar