O‘zbekiston Respublikasi fuqarolarini Yaqin Sharqdagi xavfli vaziyatlar sababli olib chiqish ishlari davom etmoqda. Hozirgi vaqtda Bahrayn, Quvayt, Suriya, Iroq, Eron, Qatar va Isroil havo hududi parvozlar uchun yopiq bo‘lib turibdi.

28-fevraldan 7-mart ertalab soat 10:00 holatiga ko‘ra, Madina va Jidda aeroportlaridan 63 ta parvoz amalga oshirilib, 13 543 nafar O‘zbekiston fuqarosi olib kelingan. Dubay aeroportidan esa 9 ta parvozda 1 401 nafar fuqaro O‘zbekistonga qaytarilgan.

Shuningdek, xorijiy aviakompaniyalar Fly Nas (5 ta) va Fly Dubai (3 ta) orqali Jidda va Dubaydan Toshkent va Namangan yo‘nalishlarida parvozlar amalga oshirilib, jami 1 365 nafar yo‘lovchi keltirilgan. Bunda O‘zbekiston fuqarolarining soni 990 tani tashkil etadi.

“O‘zaviatsiya” agentligi va Tashqi ishlar vazirligida 24/7 rejimida faoliyat yurituvchi shtab va Call-markazlar ishlamoqda. Hozirda Qatar hududida qolgan fuqarolarni Saudiyaning Riyoz aeroporti orqali olib chiqish ishlari ham tashkil etilmoqda.

Transport vazirligi turoperator va agentlarni yuzaga kelgan fors-major holatlarida ham mijozlar huquqlarini ta’minlashga, sug‘urta polislaridan to‘g‘ri foydalanishga va aviakompaniyalar bilan aviachiptalarni xavfsiz yo‘nalishlarga o‘zgartirish orqali fuqarolarni olib chiqishga chaqirmoqda.

Hozirgi vaqtda Quvayt, Qatar va Bahraynga yaqin bo‘lgan Saudiyaning Dammam va Riyoz aeroportlarida xalqaro yo‘nalishlarda muntazam aviaqatnovlar davom etmoqda, aviachiptalar sotuvda mavjud. Shuningdek, Jidda va Madina yo‘nalishlaridagi parvozlar ham normal rejimda amalga oshirilmoqda.

Fuqarolardan ehtiroslarga berilmaslik, o‘z turoperatorlari va agentlari bilan muntazam aloqada bo‘lish tavsiya qilinmoqda.

• O‘zbekistonlik
• Transport vazirligi
• parvoz