Air Tashkent aviakompaniyasi direktori o‘rinbosari Anvar Sulaymonov “O‘zbekiston 24” telekanaliga bergan intervyusida O‘zbekistonga Switchblade rusumidagi uchar taksilar 2028-yildan 2030-yilgacha olib kelinishini ma’lum qildi. Bildirilishicha, hozirgi paytda AQShning Samson Sky kompaniyasi bilan sertifikatlash jarayoni ketmoqda. Air Tashkent’ning 10 dan ortiq xodimi Samson Sky kompaniyasida malaka oshirib qaytgach, texnik xizmat ko‘rsatish bo‘yicha faoliyat yuritadi.

“Air Tashkent bilan Samson Sky imzolagan shartnomaga asosan, uch turda mahsulotni chiqarishni rejalagan. Birinchi turdagi bu benzinli dvigatelimiz. Ikkinchi bu elektr dvigatelimiz. Uchinchi bu quyosh paneli bilan harakatlanadigan uchar taksi. Uchar taksilar 800 kilometrgacha uchishi mumkin. Masalan, olaylik, shu Toshkentdan uchdi, uch soatda, to‘rt soatda Urganchda bo‘lishingiz mumkin”,– dedi Anvar Sulaymonov.

Uning so‘zlariga ko‘ra, uchar taksining sig‘imi uch kishidan yetti kishigacha bo‘ladi. 130 metrlik joy bo‘lsa, u uchar taksiga aylanadi. Bunday transport havoga ko‘tarilishi uchun 3 daqiqani tashkil etadi. Uchar taksi ichida sovitish tizimi, navigatsiya tizimi hamda avtopilot tizimi mavjud.

“Bu uchar taksimiz muhit tanlamaydi, har qanday ob-havo sharoitlarida uchishi mumkin. Avtopilot tizimi orqali uchar taksi haydovchisiz uchishi mumkin. Lekin xavfsizlik nuqtai nazaridan, haydovchi pultda o‘tirishi shart”, – deya qo‘shimcha qildi Air Tashkent aviakompaniyasi direktori o‘rinbosari.

Fevral oyida Air Tashkent AQShning Samson Sky kompaniyasidan 300 ta Switchblade rusumli uchuvchi avtomobil sotib olish bo‘yicha kelishuvga erishilgan edi. Ma’lumot uchun, Samson Sky – AQShning Oregon shtatida joylashgan innovatsion texnologiya kompaniyasi bo‘lib, uchuvchi avtomobillar ishlab chiqish bilan shug‘ullanadi.

• AQSh
• Avtomobil
• Hamkorlik
• O‘zbekiston