O‘tgan yilning aprel oyida ish joyida vafot etgan Bosh prokuratura xodimi Samirbek Raxmonovning otasi ham vafot etdi. U o‘g‘lining ish joyida vafot etganligi sababli, Samirbekning 4 nafar voyaga yetmagan farzandlari va beva qolgan turmush o‘rtog‘i uchun Bosh prokuraturadan tovon puli undirish bo‘yicha sudlashgan edi. 

Fuqarolik ishlari bo‘yicha Mirobod tumanlararo sudi ishni Bosh prokuratura foydasiga hal qilganidan keyin, marhum xodimning otasi Toshkent shahar sudiga apellyatsiya shikoyati bergan va apellyatsiya sudi FIB Mirobod tumanlararo sudining qarorini noqonuniy deb topib, uni bekor qilgan va yana qaytadan ko‘rish uchun ishni Mirbod sudiga yuborgan edi.

Ayni Mirbod sudida bu ish qayta ko‘rilayotgan vaqtda islom huquqi bo‘yicha mutaxassis bo‘lgan Aʼzamjon Raxmonov vafot etgan.

Eslatib o‘tamiz, yuqorida taʼkidlanganidek, mazkur sud ishini ko‘rish davomida Toshkent shahar sudi apellyatsiya sudlov hayʼati o‘g‘il – Samirbek Rahmonovning vafoti yuzasidan Bosh prokuratura foydasiga xulosa bergan mutaxassislar qonunchilikni buzgan degan fikrga kelgan. Bu esa, marhum xodimning mehnat faoliyati bilan bog‘liq sabab tufayli vafot etganligini tasdiqlashi mumkin.

Agar navbatdagi sud majlisi Samirbek Rahmonovni ish faoliyati bilan bog‘liq sabab bilan vafot etgan deb topsa, Bosh prokuratura marhumning yaqinlariga to‘lovlarni, xususan, Mehnat kodeksining 194-moddasiga asosan 6 yillik o‘rtacha ish haqi miqdoridagi nafaqa to‘lovlari to‘lab berishi mumkin.

• Bosh prokuratura
• Mehnat