AQSh poytaxtida o‘tkazilgan nufuzli White House Correspondents’ Dinner vaqtida keskin holat yuz berdi. Tadbir Washington Hilton mehmonxonasida o‘tayotgan paytda noma’lum shaxs o‘q uzgan.

Voqeaga ko‘ra, qurollangan shaxs xavfsizlik tekshiruv hududiga bostirib kirib, bir necha bor o‘t ochgan. Shu zahoti maxsus xizmatlar ishga tushib, mehmonlar va rasmiylarni zudlik bilan evakuatsiya qilgan. Tadbirda ishtirok etgan Donald Tramp ham rafiqasi bilan birga xavfsiz hududga olib chiqilgan.

Guvohlarning aytishicha, zal ichida vahima yuzaga kelib, ko‘pchilik stol ostiga yashirinishga majbur bo‘lgan. Biroq otishma asosan kirish qismi yaqinida sodir bo‘lgani sababli hujumchi asosiy zalga kira olmagan.

Hujumchi tez orada qo‘lga olingan. Hodisa oqibatida kamida bir nafar xavfsizlik xodimi jarohat olgan, ammo og‘ir talafotlar qayd etilmagan.

Hozirda hodisa yuzasidan tergov ishlari olib borilmoqda. Dastlabki taxminlarga ko‘ra, hujumchi yolg‘iz harakat qilgan.