Andijon viloyatining Asaka tumanida o‘tkazilgan tezkor tadbirda fuqarolarni “Haj” ziyoratiga yuborishni va’da qilgan shaxs qo‘lga olindi.

Bosh prokuratura huzuridagi Departament hamda boshqa huquqni muhofaza qiluvchi organlar hamkorligida o‘tkazilgan operatsiya davomida fuqaro M.Ch. ikki nafar fuqaroni Saudiya Arabistoniga yuborishni va’da qilib, buning evaziga 18 ming AQSh dollari talab qilgani aniqlangan. U kelishilgan mablag‘ning 9 ming dollarini olayotgan vaqtida ashyoviy dalillar bilan ushlangan.

Dastlabki ma’lumotlarga ko‘ra, ushbu shaxs ziyorat safarini noqonuniy yo‘l bilan tashkil etishni rejalashtirgan bo‘lishi mumkin. Fuqarolarning ishonchidan foydalanib, katta miqdorda pul undirishga uringanlik holati huquqni muhofaza qiluvchi organlar tomonidan o‘z vaqtida fosh etilgan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari olib borilmoqda. Huquq-tartibot idoralari fuqarolarni bunday holatlarda ehtiyot bo‘lishga, ziyorat safarlarini faqat rasmiy va ishonchli tashkilotlar orqali amalga oshirishga chaqirmoqda.