Bugungi kunda aeroport terminali 30 yildan ortiq vaqt davomida xizmat qilib kelmoqda. Biroq yo‘lovchilar oqimi va zamonaviy talablar oshgani sababli uning imkoniyatlari yetarli darajada emasligi qayd etildi.

Shu munosabat bilan aeroportni kompleks modernizatsiya qilish rejalashtirilmoqda. Loyiha doirasida uchish-qo‘nish yo‘lagini kengaytirish va uzaytirish, aerodrom infratuzilmasini yangilash, shuningdek yangi yo‘lovchi va yuk terminallarini qurish ko‘zda tutilgan.

Yangi terminal maydoni 20 ming kvadrat metrni tashkil etib, bir vaqtning o‘zida 1,2 ming yo‘lovchiga xizmat ko‘rsatish imkoniyatiga ega bo‘ladi. Shuningdek, samolyotlar uchun qo‘shimcha turargohlar qurilib, havo kemalari sig‘imi 10 tagacha yetkaziladi.

Terminalda zamonaviy ro‘yxatdan o‘tish tizimlari, keng kutish zallari, servis xizmatlari va VIP yo‘lovchilar uchun alohida sharoitlar yaratiladi.

Davlat rahbari aeroport har qanday hududning “darvozasi” ekanini ta’kidlab, xizmat ko‘rsatish sifati va transport infratuzilmasini rivojlantirish bo‘yicha tavsiyalar berdi. Shuningdek, loyihani amalga oshirishda xalqaro tajribaga ega operatorlarni jalb etish muhimligi qayd etildi.

Mazkur loyiha Farg‘ona vodiysining transport bog‘liqligini kuchaytirish, sayyohlar oqimini oshirish va hududning logistika markazi sifatidagi o‘rnini mustahkamlashga xizmat qilishi kutilmoqda.