Xivada “Eco-schools Uzbekistan” loyihasining asosiy ramzi — Yashil bayroq tantanali ravishda ko‘tarildi. Loyiha milliy operatori — Zamin fondi tomonidan o‘tkazilgan audit yakunlariga ko‘ra, 30 ta maktab dasturning eng faol ishtirokchisi sifatida e’tirof etildi va ekologik ta’lim yo‘nalishida xalqaro darajada tan olindi.

Tadbirda Ziroat Mirziyoyeva o‘quvchilarni samimiy tabriklab, ularni erishilgan natijalar bilan cheklanib qolmaslikka chaqirdi. U yoshlarning matonati va Vatanga muhabbati ularni tabiatning haqiqiy himoyachilariga aylantirayotganini ta’kidladi. Shuningdek, bu sa’y-harakatlar Birlashgan Millatlar Tashkilotining Barqaror rivojlanish maqsadlariga erishishda muhim ahamiyat kasb etayotgani qayd etildi.

Bayram doirasida o‘quvchilar uchun sog‘lom ovqatlanish mavzusida mahorat darslari ham tashkil etildi. Xalqaro toifadagi oshpaz va mutaxassislar bolalarga muvozanatli ratsion va to‘g‘ri ovqatlanish odatlarini shakllantirish bo‘yicha amaliy tavsiyalar berdi.

Shuningdek, FAOning O‘zbekistondagi vakolatxonasi tomonidan o‘quvchilar, boshlang‘ich sinf o‘qituvchilari hamda maktab oshxona xodimlari uchun mo‘ljallangan uslubiy qo‘llanmalar taqdim etildi. Ushbu materiallar kelgusida respublika bo‘ylab o‘tkaziladigan treninglar uchun asos bo‘lib xizmat qiladi.

loyiha yosh avlodda ekologik madaniyatni shakllantirish va sog‘lom turmush tarzini targ‘ib etishga qaratilgan muhim tashabbus sifatida baholanmoqda.