Davlat xavfsizlik xizmati, Bosh prokuratura huzuridagi Departament hamda ichki ishlar organlari hamkorligida o‘tkazilgan tezkor tadbirlar davomida bir nechta korrupsion holatlar aniqlandi.

 Xorazm viloyatida IIB xodimi fuqaroni ichki ishlar organlariga ishga joylashtirish evaziga 4500 AQSH dollari talab qilgan. U 1800 dollar va 2,4 mln so‘m olayotgan vaqtida qo‘lga olingan.

 Toshkent viloyatida ta’lim bo‘limi metodisti fuqarodan oilaviy bog‘cha ochish uchun ruxsatnoma rasmiylashtirib berish evaziga 1,5 mln so‘m va 200 dollar talab qilgan. U mablag‘ni olayotganida ushlangan. Shuningdek, ushbu jarayonda ishtirok etgan Favqulodda vaziyatlar bo‘limi inspektorining ham noqonuniy harakatlariga chek qo‘yildi.

 Qoraqalpog‘iston Respublikasida esa fuqaro ayol boshqa bir shaxsga yoshga doir nafaqani rasmiylashtirishda yordam berish uchun ish stajini sun’iy oshirib berish evaziga 7 mln so‘m olayotganida qo‘lga olindi.

Mazkur holatlar yuzasidan jinoyat ishlari qo‘zg‘atilib, tergov harakatlari olib borilmoqda.