Qozog‘iston 2027-yildan boshlab Rossiyadan elektr energiyasi importini to‘liq to‘xtatishni rejalashtirmoqda. Bu haqda energetika vaziri o‘rinbosari Sungat Yesimxanov ma’lum qildi.

Unga ko‘ra, rejalashtirilgan barcha energetika obyektlari o‘z vaqtida ishga tushirilsa, mamlakat ichki talabni mustaqil ravishda qoplay oladi. Bunda atom elektr stansiyasi qurilishining yakunlanishi kutilmaydi.

Rasmiy ma’lumotlarga ko‘ra, 2025-yilda Qozog‘istonda 123,1 mlrd kVt/soat elektr energiyasi ishlab chiqarilgan, iste’mol esa 124,6 mlrd kVt/soatni tashkil etgan. Hozirda yuzaga kelayotgan tanqislikning bir qismi Rossiya importi orqali qoplanmoqda. Shu bilan birga, import qilingan elektrning bir qismi Qirg‘izistonga qayta eksport qilinayotgani ham qayd etildi.