Ukraina prezidenti Vladimir Zelenskiy turmush o‘rtog‘i Yelena Zelenskaya bilan ajrashishga tayyorgarlik ko‘rayotgani haqida xabarlar tarqaldi. Bu haqda RIA Novosti Rossiya kuch tuzilmalaridagi manbalariga tayanib ma’lum qilgan.

Xabarda aytilishicha, Zelenskiy Kiyev yaqinidagi “Dinastiya” nomli hashamatli turar joy majmuasidagi kottejlardan birini Yelena Zelenskayaga qoldirishni rejalashtirgan.

Avvalroq Zelenskiy ofisining sobiq rahbari Andrey Yermak Kiyev yaqinida elita uy-joylar qurilishida noqonuniy mablag‘larni legallashtirishda ayblangandi. Ukraina Milliy korrupsiyaga qarshi byurosi energetika sohasidagi korrupsiya ishi bo‘yicha audioyozuvlarning yangi qismlarini e’lon qilgan.

Ma’lumotlarga ko‘ra, “Dinastiya” loyihasi ishtirokchilari 460 million grivnadan ortiq mablag‘ni legallashtirgan. Shuningdek, manbalarda ushbu majmuadagi to‘rtinchi uy Yelena Zelenskaya uchun qurilgani aytilmoqda.

11-may kuni Ukraina Korrupsiyaga qarshi kurash milliy byurosi va maxsus prokuratura Andrey Yermakka nisbatan jinoiy yo‘l bilan olingan mulklarni legallashtirish bo‘yicha ayblov e’lon qilgan. Unga 15 yilgacha ozodlikdan mahrum qilish jazosi tahdid qilmoqda.