Parij apellyatsiya sudi Saudiya Arabistoni valiahd shahzodasi Muhammad bin Salmonga nisbatan jurnalist Jamol Qoshiqchining o‘ldirilishi yuzasidan sud tergovini boshladi.

Ma’lum qilinishicha, tergov qiynoqlar va majburiy bedarak yo‘qolish holatlari bo‘yicha olib boriladi. Bu qaror Fransiya prokuraturasining uzoq yillik qarshiligidan so‘ng qabul qilingan.

The Washington Post jurnalisti Jamol Qoshiqchi 2018-yilda Istanbuldagi Saudiya Arabistoni konsulligida o‘ldirilgan edi. Turkiya prokuraturasiga ko‘ra, jurnalist bo‘g‘ib o‘ldirilgan, jasadi bo‘laklarga bo‘lingan va yo‘q qilingan.

AQSh razvedka xizmatlari ushbu qotillik operatsiyasini Saudiya valiahd shahzodasi Muhammad bin Salmon ma’qullagan deb hisoblaydi. Saudiya tomoni esa buni rad etib kelmoqda.

Qoshiqchining o‘ldirilishi xalqaro miqyosda katta rezonans uyg‘otgan va Saudiya Arabistoniga nisbatan keskin tanqidlarga sabab bo‘lgan edi.