Andijon viloyatida o‘tkazilgan tezkor tadbirlarda noqonuniy yer savdosi bilan bog‘liq bir nechta mansabdor shaxslar ushlandi.

Ma’lum bo‘lishicha, Farg‘ona vodiysi magistral kanallardan foydalanish boshqarmasining 2-Shahrixon bo‘limi 3-gidrouchastkasi boshlig‘i chorvachilik bilan shug‘ullanmoqchi bo‘lgan fuqaroga Katta Farg‘ona kanali himoya hududidagi 30 sotix yer maydonini ijaraga rasmiylashtirib berish evaziga 40,5 ming AQShdollari talab qilgan.

U oldindan 20 ming dollar olayotgan vaqtida DXX va Departament xodimlari tomonidan ashyoviy dalillar bilan ushlandi.

Tergov davomida ushbu noqonuniy ishga boshqarma bo‘lim boshlig‘i ham aloqador ekani aniqlanib, u ham 3 ming dollar olayotgan vaqtida qo‘lga olindi.

Shuningdek, mazkur yer maydonidan foydalanib kelgan gidrouchastka xodimi ham yer masalasini hal qilib berish uchun 19 ming dollar talab qilgani qayd etildi.

Yana bir holatda esa Oltinko‘l tumanidagi ta’lim muassasasi direktori maktab hududidagi 1,1 gektar yer bo‘yicha hujjatlarni tasdiqlab berish evaziga 15 ming dollar talab qilgan. U oldindan 10 ming dollar olayotgan vaqtida ushlandi.