Huquqni muhofaza qiluvchi organlar tomonidan o‘tkazilgan tezkor tadbirlar davomida Namangan viloyati va Toshkent shahrida muomalaga kiritilishi rejalashtirilgan sifati kafolatlanmagan dori vositalari aniqlandi. Namangan viloyatining Yangiqo‘rg‘on tumanida “I.Sh.” MCHJ rahbari dorixonada umumiy qiymati 452 million so‘mlik, sifatini tasdiqlovchi hujjatlarga ega bo‘lmagan 1 011 turdagi dori vositasini savdoga qo‘ygani fosh etildi. Mazkur dorilar ashyoviy dalil sifatida olib qo‘yildi.

Toshkent shahrining Yangihayot tumanida esa “Y.Ph.” MCHJ rahbari “Tetsentrik” nomli dori vositasini shifokor retseptisiz 9 150 AQSH dollariga sotayotgan vaqtida ushlandi. Tekshiruv davomida dorixonadan umumiy qiymati 309,3 million so‘mlik, sifati kafolatlanmagan hamda yaroqlilik muddati o‘tgan 41 turdagi dori vositasi musodara qilindi.Shuningdek, “Ph.P.” MCHJga tegishli dori vositalarini qadoqlash sexida davlat reyestrida ro‘yxatdan o‘tmagan, muvofiqlik sertifikatiga ega bo‘lmagan va yaroqlilik muddati o‘tgan, umumiy qiymati 139,4 million so‘mlik 100 turdagi dori vositasi saqlanayotgani aniqlandi.

Mazkur holatlar yuzasidan Jinoyat kodeksining 186-3-moddasi bilan jinoyat ishlari qo‘zg‘atilib, tergov harakatlari olib borilmoqda.