Germaniya Federal Prezidenti Frank-Valter Shtaynmayerning O‘zbekistonga rasmiy tashrifi doirasida ikki davlat Birinchi xonimlari — O‘zbekiston Respublikasi Birinchi xonimi Ziroat Mirziyoyeva va Germaniya Birinchi xonimi Elke Byudenbender o‘rtasida uchrashuv bo‘lib o‘tdi.

Samimiy va do‘stona ruhda o‘tgan muloqotdan so‘ng mehmonlar Toshkentdagi Ijtimoiy himoya milliy agentligi huzurida faoliyat yuritayotgan Xalqaro inklyuziv xabga tashrif buyurdilar.Tashrif davomida Birinchi xonimlarga markazning asosiy yo‘nalishlari haqida batafsil ma’lumot berildi. Xususan, inklyuziv kasbiy ta’limni rivojlantirish, zamonaviy o‘quv texnologiyalarini joriy etish hamda yoshlar, jumladan, nogironligi bo‘lgan shaxslarni mehnat bozorida talab yuqori bo‘lgan kasblarga tayyorlash bo‘yicha amalga oshirilayotgan ishlar taqdim etildi.Mehmonlar markazdagi o‘quv ustaxonalari, amaliy loyihalar va ta’lim jarayonlari bilan yaqindan tanishdilar. 

Shuningdek, ular bu yerda tahsil olayotgan yoshlar bilan ochiq muloqot qilib, ularning o‘qish va kelajak rejalari haqida suhbatlashdilar.Germaniya Birinchi xonimi Elke Byudenbender O‘zbekistonda inklyuziv jamiyatni rivojlantirish, ta’lim tizimini modernizatsiya qilish hamda yoshlar uchun keng imkoniyatlar yaratish borasida olib borilayotgan islohotlarni yuqori baholadi.Uning fikricha, bunday markazlar jamiyatda teng imkoniyatlarni ta’minlash va har bir insonning salohiyatini ro‘yobga chiqarishda muhim ahamiyat kasb etadi.