O‘zbekistonda 2025 yilgi oliy ta’lim muassasalari bitiruvchilarining bandlik va daromad ko‘rsatkichlari e’lon qilindi. Ta’lim sifatini ta’minlash milliy agentligi ma’lumotlariga ko‘ra, mamlakatdagi 114 ta oliygohni tamomlagan 242,6 ming nafar bitiruvchining ishga joylashish muddati o‘rtacha 2 oy 1 kunni tashkil etgan.Hisobotda qayd etilishicha, bitiruvchilarning bandlik darajasi 75 foizga yetgan. Shuningdek, ularning 60,1 foizi kamida to‘rt oy davomida doimiy ish bilan ta’minlangan.

Bitiruvchilarning o‘rtacha oylik ish haqi esa 5,1 million so‘mni tashkil qilgan.Yo‘nalishlar kesimida eng yuqori maosh biznes va boshqaruv sohasida kuzatilib, o‘rtacha 8,5 million so‘mni tashkil etgan. Huquq yo‘nalishi bitiruvchilari o‘rtacha 7,3 million so‘m, axborot-kommunikatsiya texnologiyalari sohasi vakillari esa 6,8 million so‘m maosh olmoqda.Bitiruvchilar sifati indeksida matematika va statistika yo‘nalishi 69,6 ball bilan yetakchilik qilgan. Keyingi o‘rinlarda ta’lim yo‘nalishi 66,7 ball va biznes hamda boshqaruv yo‘nalishi 63,9 ball bilan qayd etilgan.

Shuningdek, eng yuqori natija ko‘rsatgan 20 ta oliy ta’lim muassasasining karera markazlari 500 million so‘mdan rag‘batlantirilishi belgilangan.Mutaxassislar fikricha, mazkur ko‘rsatkichlar mehnat bozorida malakali mutaxassislarga talab ortib borayotganini ko‘rsatadi. Yakuniy natijalar esa 12 oylik kuzatuv ma’lumotlari asosida joriy yilning avgust oyida e’lon qilinadi.