“Universal Music Publishing Group” kompaniyasi britaniyalik xonanda Sting tomonidan kuylangan barcha qoʻshiqlardan foydalanish huquqini sotib oldi. Bu haqida xonandaning rasmiy saytida maʼlum qilingan.

Ijodkor va kompaniya oʻrtasidagi kelishuv qiymati ochiqlanmagan, mahalliy nashrlar kompaniya qoʻshiqlar uchun 300 million AQSh dollari miqdorida haq toʻlaganini maʼlum qilishgan.

Taʼkidlanishicha, kompaniya Stingga tegishli boʻlgan qoʻshiqlardan tashqari, “The Police” guruhi kompozitsiyalari – “Roxanne”, “Every Breath You Take”, “Shape Of My Heart”, “Fields Of Gold, Englishman in New York“ni ham sotib olgan. Sting oʻtgan yilning kuz faslida taqdim etilgan “The Bridge” musiqiy albomining mualliflik huquqini ham kompaniyaga sotish qaroriga kelgan.

“Men butun ijodiy faoliyatim davomida UMG kompaniyasi bilan hamkor sifatida davomli va samarali aloqa oʻrnata oldim, shuning uchun ham barcha taronalarni yagona va ishonchli joyda birlashtirish tabiiy qaror edi”, dedi Sting.

Kompaniya Sting bilan kelishuv imzolash natijasida uning 600 dan ortiq qoʻshiqlari uchun mualliflik huquqini qoʻlga kiritgan, bu esa endilikda kompaniya taronalarni eʼlon qilish ortidan daromad olishi mumkinligini anglatadi.

Maʼlumot uchun, Sting oʻzining ijodiy faoliyatini “The Police” guruhining xonandasi sifatida boshlagan. Ijodkor bugungi kunga qadar 15 ta musiqiy albom taqdim etgan.

• San’at
• Shou-biznes
• mashhurlar