Peshlavhani reklamaga tenglashtirish rasman to‘xtatildi.

O‘zbekistonda tadbirkorlar peshlavha uchun reklama pasportini rasmiylashtirish talabidan rasman qutuldi. Tashqi reklama obyektlarini buzishdagi qo‘pol qonunbuzarliklarga ham chek qo‘yish uchun bunday ishlarning aniq tartibi belgilandi. Biznes o‘ziga tegishli transport vositalariga o‘z reklamasini joylashtirishi tartibi ham soddalashtirildi. Toshkent shahrining dizayn-kodi 10-dekabrgacha jamoatchilik muhokamasida bo‘ladi.

Toshkent shahrida ko‘plab tadbirkorlarning noroziligini uyg‘otgan peshlavha muammosi yuzasidan qonunchilikka o‘zgartirish kiritildi. Bu haqda Raqobat qo‘mitasi xabar berdi.

Vazirlar Mahkamasining 13-oktyabrdagi qaroriga asosan, bundan buyon tadbirkorlik subyekti o‘zi egallab turgan bino yoki inshootning tashqi tomonida (kirish joyida) joylashtirgan nomi va faoliyat turi (ixtisosligi) to‘g‘risidagi axborot (peshlavha) shu jumladan, firma nomi, tovar yoki xizmat ko‘rsatish belgisi, tashqi reklama obyekti hisoblanmaydi hamda ushbu axborot vositasi uchun reklama joyining pasportini rasmiylashtirish talab etilmaydi.

Dizayn-kod to‘satdan o‘zgarmaydi

Qarorda belgilanishicha, dizayn-kod bo‘yicha qarorlar faqat jamoatchilik muhokamasidan, jumladan, regulation.gov.uz portalidan o‘tgandan keyin qabul qilinadi. Ular e’lon qilingandan 3 oy o‘tib kuchga kiradi.

Dizayn-kodni joriy etishda ro‘yxatdan o‘tgan tovar belgisidan foydalanish imkoniyati saqlanishi shart.

Toshkent shahrining dizayn-kodi 10-dekabrgacha tadbirkorlar va OAV ishtirokida muhokama qilinadi.

Tashqi reklama obyektlarini buzish

Hujjatda majburiy demontaj ishlarining aniq tartibi belgilandi:

demontaj kuni va vaqti haqida 2 kun oldin veb-saytda e’lon qilinadi, egasiga esa yozma xabar yuboriladi;

demontaj faqat ish kunlari soat 09:00–18:00 oralig‘ida amalga oshiriladi;

demontaj vaqtida egasi ishtirokida dalolatnoma tuziladi, unda sana, vaqt, sabab, fotosuratlar va konstruksiya saqlashga yuborilgan manzil ko‘rsatiladi;

tadbirkorga oid qarorlar va xabarnomalar uning yuridik manziliga yozma ravishda ham yuboriladi.

Qisqa muddatli reklama

Qisqa muddatli reklama uchun aniq muddatlar ham belgilandi: qurilish obyektlarida reklama qurilish tugaguncha turishi mumkin, bayram va tadbirlar uchun esa 30 kungacha.

Jamoatchilik nazorati

Tashqi reklama obyektlarining joylashtirilishi bo‘yicha “Xalq nazorati” elektron portali orqali jamoatchilik nazorati yo‘lga qo‘yiladi.

Avtomobillardagi reklamalar

Yuridik shaxslarning mulk yoki boshqa ashyoviy huquq asosida tegishli bo‘lgan o‘z avtotransport vositalariga o‘ziga tegishli tovar belgisi, faoliyat turiga tegishli yozuvlar va ishlab chiqaradigan mahsulotlari (ko‘rsatadigan xizmatlari) haqidagi reklama ma’lumotlari soddalashtirilgan tartibda joylashtiriladi.

Bunda yuridik shaxslar avtotransport vositalariga o‘ziga tegishli bo‘lgan tovar belgisini, faoliyat turiga tegishli yozuvlar va ishlab chiqaradigan mahsulotlari (ko‘rsatadigan xizmatlari) haqidagi reklama ma’lumotlarini joylashtirish uchun xabarnomani YAIDXP orqali elektron shaklda yuboradi.

Xabarnoma YaIDXPda qabul qilingan vaqtdan boshlab, Qoraqalpog‘iston Respublikasi Vazirlar Kengashi, viloyatlar hokimliklari va Toshkent shahrida Departamenti xabardor qilingan hisoblanadi va tizim tomonidan reklama joyining pasporti avtomatik ravishda shakllantiriladi.

Xabarnomada noto‘g‘ri ma’lumotlar, shuningdek, o‘zgalarga tegishli tovar belgilari taqdim etilganligi aniqlangan taqdirda, shakllantirilgan reklama joyining pasporti avtomatik ravishda bekor qilinadi va bu haqida yuridik shaxsga asoslantirilgan xat yuboriladi.

Yuridik shaxslar avtotransport vositalariga o‘ziga tegishli bo‘lgan tovar belgisini, faoliyat turiga tegishli yozuvlar va ishlab chiqaradigan mahsulotlari (ko‘rsatadigan xizmatlari) haqidagi reklama ma’lumotlarini joylashtirish huquqni beruvchi reklama joyi pasportini rasmiylashtirish uchun yig‘im undirilmaydi.

Pasportni onlayn bekor qilish mumkin: reklama joyi pasportidan ixtiyoriy voz kechish uchun YAIDXP orqali ariza yuboriladi. Ma’lumotlar soliq organlariga avtomatik tarzda yetkaziladi.