5 дақиқада тайёр бўладиган майонез

Пазанда 13-11-2014

Уйда тайёрланган маҳсулотлар фойдалироқ ва мазали эканлигига шубҳа йўқ. Бундан ташқари, маҳсулот уйда тайёрланганда, ичида нима борлигини аниқ билиб, зарарли моддаларни истеъмол қилишдан хавотирланмаса бўлади. Бу, айниқса, майонезга тегишли. 

Дўконда сотиладиган майонез сақлаш муддатини бир ойгача узайтирадиган таъм кучайтиргич ва озиқ қўшимчалар туфайли зарарли бўлиши мумкин. Бироқ барибир соусга талаб кучли: уни салатлар, газаклар, иккинчи таомларга, ҳатто шўрваларга ҳам қўшишади. 

Майонез калорияси

Ёғ ҳиссасига қараб майонез:

юқори калорияли — 55 фоиздан ортиқ, 

ўртача калорияли — 40-50 фоиз,

кам калорияли — 40 фоиздан камроқ бўлади.

Майонезнинг ёғлилик даражаси 67 фоиз бўлгани маъқул, аммо баъзида 80 фоизгача ҳам етади. Унинг калорияси 100 граммда 800 килокалорияга тенг бўлади. 

Бу соусни кўп истеъмол қилмаслик керак. Баъзида (иложи бўлганда) ўрнига сметана ёки енгилроқ маҳсулотдан фойдаланган маъқул. 

Майонезни уйда тайёрлаш

Майонез ўрнига бошқа маҳсулот ишлата олмасангиз, уни мустақил тайёрлашга уриниб кўринг. Шунда унда ҳеч қандай зарарли қўшимчалар йўқлигига ишончингиз комил бўлади. Қолаверса, у шунчалик мазали чиқадики, дўкон майонезини хоҳламай қоласиз. 

Уйда тайёрланадиган майонезнинг ягона камчилиги — совуткичда узоқ сақлаб бўлмаслиги. Узоғи билан 7-10 кун сақлаш мумкин. Аммо уни тайёрлашга 5-10 дақиқа вақт кетишини ҳисобга олсак, бу камчилик унчалик катта эмас. 

Майонез тайёрлаш сирлари

Уйда майонез тайёрлаётганда, айрим нозик жиҳатларни ҳисобга олиш керак, ўшанда яхши натижага эришасиз. 

1. Ишлатмоқчи бўлаётган маҳсулотларингизнинг ҳаммаси хона ҳароратида бўлишига аҳамият беринг. 

2. “Тўғри” ёғ танланг. Энг маъқули — рафинадланган зайтун мойи. Унинг ўрнига кунгабоқар мойи ишлатиш мумкин, лекин албатта рафинадланган бўлсин. Шунингдек, зайтун ва бошқа мой аралашмасидан ҳам фойдаланиш мумкин.  

3. Ёғни аралашмага 1 чой қошиқдан, тинимсиз аралаштириб (ёки миксер билан кўпчитиб) турган ҳолда қўшиш керак. 

4. “Провансаль” майонези хантал қўшиб тайёрланади. Агар оддий майонез хоҳласангиз, бу маҳсулотни қўшманг. 

5. Агар уйда лимон шарбати бўлмаса, ўрнига узум ёки олма сиркаси қўшиш мумкин. 1 та тухумга 1 чой қошиқ сирка қўшиш керак, ундан кўп эмас. 

6. Майонез қуюқроқ чиқишини хоҳласангиз, яна озгина ўсимлик мойи қўшинг. Агар майонез, аксинча, ҳаддан ортиқ қуюқ чиққан бўлса, 1-2 қошиқ илиқ сув қўшиб, аралашмани яна озроқ кўпчитинг. 

Уйда тайёрланадиган майонез

Ҳеч қандай таъм қўшимчалари, бўёқлар ва қўшимча маҳсулотлар солмай тайёрланадиган майонез. Унга тухум сариғи, ўсимлик мойи, туз, хантал ва лимон шарбати керак бўлади. 

Керакли маҳсулотлар:

2 та тухум сариғи

250 мл ўсимлик мойи

Ярим чой қошиқ туз

1 ош қошиқ лимон шарбати

1-2 чой қошиқ хантал

Тайёрлаш усули:

1. Тухум сариғи, туз ва шакарни аралаштиринг. Миксердан фойдалансангиз ҳам бўлади. Шакар ва туз буткул эриб, бир хил масса ҳосил бўлгунча аралаштиринг.

2. Аста-секин ўсимлик мойини бир қошиқдан қуйинг. Тўхтатмай аралаштиринг. 

3. Лимон шарбати ва хантал қўшинг.

Бир хил, қуюқ масса ҳосил бўлиши керак. 

Тухумсиз майонез

Майонез таркибида албатта тухум бўлиши керак деган фикр бор, аммо бу соусни тухум сариғисиз тайёрлаш рецептлари ҳам мавжуд. Сизга энг оддий йўлини тавсия қиламиз. Майонез таъми ёқимли чиқади, тоблама, салат, бутербродларга жуда мос. Беш дақиқада тайёр бўлади. 

Керакли маҳсулотлар:

150 мл сут

300 мл ўсимлик мойи

1 ош қошиқ хантал

2-3 ош қошиқ лимон шарбати

Таъбга кўра туз

Тайёрлаш усули:

1. Сут ва ёғни блендер косасида ёки бошқа чуқур идишда аралаштиринг. Туз ва хантал қўшинг. Яна кўпиртиринг — аралашма эмульсияга айланиши керак.

2. Шундан сўнг лимон шарбати қўшиб, қуюқлашгунча кўпиртиринг. 

Таъбга кўра бир чимдим шакар, лимон шарбати ўрнига сирка қўшиш мумкин.



МАҚОЛА МАНЗУР КЕЛГАН БЎЛСА ДЎСТЛАРИНГИЗ БИЛАН ҲАМ БЎЛИШИНГ

МАЗКУР БЎЛИМДАН ЭНГ СЎНГГИ МАҚОЛАЛАР



Изоҳлар

Изоҳингиз учун раҳмат. Тез орада сайт маъмурияти уни кўриб чиқиб, чоп этади.
Изоҳ ёзиш

Биринчилардан бўлиб изоҳ қолдиринг!

Биз сизга дунёнинг гўзаллигини эслатиб турамиз. Ишдан, мактабдан ва кўчадаги бошқа юмушлардан ҳориб уйга қайтганингизда, сизни ҳаётнинг оддий ва одатий ташвишларидан бироз чалғита олсак, ютуғизмиз шудир бизнинг.
Яндекс.Метрика

© 2019 XABARDOR.UZ