Olmaotada yanvar voqealari chog‘ida o‘g‘irlangan qurol-yarog‘larning katta partiyasi qo‘lga olindi.

Qozog‘istondagi tartibsizliklar bo‘yicha jinoyat ishini tergov qilish jarayonida transport politsiyasi xodimlari shu yilning 5-6-yanvar kunlari Olmaota shahridagi qurol do‘konlaridan o‘g‘irlab ketilgan qurollar partiyasi yashirilgan joyni aniqlashgan. Bu haqda Politsiya transport boshqarmasi boshlig‘i O‘nal Bekiyev maʼlum qildi.

O‘nal Bekiyevga ko‘ra, Olmaota aeroportidagi tartibsizliklarda ishtirok etgan 23 yoshli O‘zbekiston fuqarosi mazkur o‘g‘irlikda gumon qilinib qo‘lga olingan va uning yashash joyida ikkita pichoq va bitta pnevmatik to‘pponcha olib qo‘yilgan.

Shuningdek, politsiya uning 43 yoshli sherigini ham qo‘lga olgan. Tintuv chog‘ida mazkur shaxsning yashash xonadonidan 19 dona pnevmatik qurol va ular uchun patronlar, 10 dona pichoq, bitta arbalet, oltita optik nishon va uchta optik moslama olib qo‘yildi.

– Mazkur holat yuzasidan tergov harakatlari olib borilmoqda. Gumonlanuvchi shaxslarning boshqa jinoyatlarga aloqadorligi tekshiriladi. Shuningdek, ularning sheriklarini aniqlash va qo‘lga olish choralari ko‘rilmoqda”, – deydi O‘nal Bekiyev.

Eslatib o‘tamiz, avvalroq ham Qozog‘istondagi tartibsizliklarda aloqadorlikda ayblanib, 14 nafar o‘zbekistonlik qo‘lga olingani aytilgan edi. 

• Jinoyat
• Namoyish
• O‘zbekiston
• Qozog‘iston
• Qurol
• Yanvar