Bugun, 5-yanvar kuni Krishtianu Ronaldu bilan ikki yillik shartnoma imzolagan “Al-Nasr” futbol jamoasining Saudiya Arabistoni chempionatidagi navbatdagi tur oʻyini boʻlib oʻtadi. Ammo jamoa safida Ronaldu maydonga tusha olmaydi.

Daily Mail nashrining maʼlum qilishicha, Angliya premyer ligasi doirasida Ronalduga berilgan diskvalifikatsiya Saudiya Arabistoni chempionatida ham amal qiladi.

Oʻshanda Krishtianu Ronaldu “Everton”ga qarshi oʻyinda yosh muxlisining qoʻlidan telefonni olib qoʻyganligi tufayli Angliya futbol assotsiatsiyasi tomonidan ikkita oʻyinga diskvalifikatsiya qilingan.

FIFA qoidasiga binoan bir ligada qoʻyilgan taqiq boshqa bir ligada ham amal qilinadi. Qaror chiqarilgach, APLda tanaffus eʼlon qilingandi.

Shundan soʻng Ronaldu va MYU oʻrtasidagi shartnoma bekor boʻldi. Bu oʻrtada futbolchi biron-bir ligada oʻyin oʻtkazmaganligi sababli jazo ijrosiz boʻlib kelayotgan edi.

Shu tufayli Ronaldu “Al-Nassr”ning bugun “Al Tayeye”ga qarshi uchrashuvini hamda 14-yanvar kuni “Al-Shabab”ga qarshi oʻyinda ham ishtirok eta olmaydi.

• Futbol
• Ronaldu