The Washington Post nashrining yozishicha, 19-may kuni AQSh Senatida senatorlarning  100 nafaridan 51 tasi Ukrainaga yangi harbiy va gumanitar yordam sifatida 40 milliard dollardan ortiq mablag‘ ajratishni qo‘llab ovoz bergan.

Senat maʼqullagan mazkur hujjat loyihasida jami 20,1 milliard dollarlik harbiy yordam ko‘zda tutilgan. Ukraina harbiy yordam doirasida Patriot zenit-raketa majmualari va uzoq masofaga uchuvchi artilleriya kabi ilg‘or qurol tizimlarini qabul qilib oladi.

Qonun loyihasi, shuningdek, Ukrainani umumiy iqtisodiy qo‘llab-quvvatlash uchun 8 milliard dollardan ortiq, qishloq xo‘jaligi inqirozi oqibatida yuzaga kelishi mumkin bo‘lgan oziq-ovqat tanqisligini bartaraf etish uchun global oziq-ovqat yordamiga deyarli 5 milliard dollar va qochqinlarni qo‘llab-quvvatlash uchun 1 milliard dollardan ortiq mablag‘ni ham o‘z ichiga oladi.

O‘z navbatida AQShning Respublikachilar partiyasidan kongressmen Mett Gyots Vakillar palatasida Ukrainaga gumanitar va harbiy yordam ko‘rsatishni yoqlab ovoz bergan hamkasblarini tanqid qildi. Uning taʼkidlashicha, bu mablag‘lar Ukrainaning korrupsioner amaldorlari tomonidan o‘g‘irlanadi.

19-may kuni Buyuk Britaniya Ukrainaga harbiy yordam uchun qo‘shimcha 1,3 milliard funt sterling (1,6 milliard dollar) ajratishi ham maʼlum bo‘ldi. Bosh vazir Boris Jonsonning yozishicha, Kiyevga uzoq masofaga uchuvchi artilleriya, kemaga qarshi raketalar va dronlar yuboriladi. Siyosatchining so‘zlariga ko‘ra, u Ukrainaga qo‘shimcha harbiy yordam yuborilishini Ukraina prezidenti Volodimir Zelenskiy bilan telefon orqali muloqoti chog‘ida maʼlum qilgan.

• AQSh
• Gumanitar yordam
• Senat
• Ukraina
• Urush