Avvalroq xabar qilinganidek, Xiva shahrida 4–5-iyun kunlari “Pahlavon Mahmud — bahodirlar oʻyini” II Xalqaro turniri oʻtkazildi.
Mazkur turnir Turizm va madaniy meros vazirligi, Butunjahon strongmen federatsiyasi hamda Xorazm viloyati hokimligi bilan hamkorlikda oʻtkazildi.
Unda dunyoning 14 davlati, jumladan, Braziliya, Yangi Zelandiya, Italiya, Ispaniya, Fransiya, Ozarbayjon, Qozogʻiston, Eron, Hindiston, Polsha, Yaponiya, Tojikiston va Oʻzbekistondan ishtirok etgan 15 nafar sportchi ikki kun mobaynida 5 ta tur:
- ogʻir qoplarni “Qoʻqon arava”ga ortish va uni maʼlum masofaga olib borish;
- ogʻirligi 120 dan 160 kilogrammgacha boʻlgan “Sangijumon” toshlarini koʻtarish;
-turli ogʻirlikda boʻlgan toshlar ortilgan obkachni kuch bilan koʻtarish;
- har biri 250 kg dan boʻlgan Xiva ustunlarini ushlab turish;
- bahaybat qilichlarni vertikal ushlab turish boʻyicha oʻzaro bellashishdi.
Musobaqa yakunidagi umumiy natijalarga koʻra, eronlik atlet Rizo Geytasi gʻoliblikni qoʻlga kiritdi. Ikkinchi oʻrin yangi zelandiyalik Rongo Kingga nasib etgan boʻlsa, kuchli uchlikdan rossiyalik Pyotr Martinenko joy oldi.
Shu tariqa gʻolib va sovrindorlar belgilangan 5000$, 3000$, 2000$ pul mukofotlariga ega boʻlishdi.
Turizm va madaniy meros vazirligi, Butunjahon strongmen federatsiyasi (World strongmen federation) hamda Xorazm viloyati hokimligi hamkorligida tashkil etilgan turnir davomida ishtirokchilar Xiva shahriga uyushtirilgan kichik tur doirasida Pahlavon Mahmud maqbarasiga tashrif buyurishdi.
Tadbirning yopilish marosimida yigʻilganlar uchun koʻngilochar konsert dasturi namoyish etildi.
E’tiborlisi, vazni sovrinli o‘rinlarni band etgan atletlarnikidan sezilarli darajada yengil bo‘lishiga qaramay, O‘zbekiston vakili Sirojiddin Qilichov musobaqada munosib ishtirok etgan holda, kuchli o‘nlikka kirishga muvaffaq bo‘ldi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!