Dollar 9000 soʻmlik nuqtadan oʻtdi

  • 12:12 / 13.08.2019
  • 1106

Oʻzbekistondagi tijorat banklari chet el valyutasini sotish va sotib olish kurslarini yana koʻtarishdi.

Bugun, 13-avgustdan boshlab, Oʻzbekiston banklari dollar sotib olish uchun nuqtani 8940 soʻm, sotish kursini esa 9000 soʻm qilib belgiladi.

Eslatib oʻtamiz, Amerika valyutasi kursining oʻsishi Oʻzbekistonda ikki hafta oldin boshlandi, oʻshanda bir necha kun ichida kurs oʻsishi 2 foizga teng boʻldi.

Oʻtgan hafta Oʻzbekiston Markaziy banki vaziyatni tashqi va ichki omillar taʼsirida kurs keskin koʻtarilgani bilan izohladi. Maʼlum boʻlishicha, Oʻzbekistonning asosiy iqtisodiy sheriklarida (Rossiya, Qozogʻiston va Xitoy) milliy valyutalar almashuv kursining dollarga nisbatan qadrsizlanish tendensiyasi kuzatilmoqda

Markaziy bank maʼlumotlariga koʻra, ichki omillar, asosan, import qiluvchi xoʻjalik yurituvchi subyektlar tomonidan xorijiy valyutaga boʻlgan talabning oʻsib borishi bilan bogʻliq.

Markaziy bank 10-avgustdan xorijiy valyutalarning soʻmga nisbatan yangi qiymatini belgiladi. Unga koʻra, 1 AQSH dollari 8882,00 soʻmga yetgan. 1 yevro kursi 259,80 soʻmga oshib, 9928,30 soʻmni tashkil etgan.